Horti. officer-te hnathawh ṭhat chu loneitute'n an chhawr danah teh a ni dawn - Horti. Minister

Mizoram Horticulture Ser-vice Association (MHSA) chuan nimin khan Aijal Club-ah General Conference vawi 26-na an hmang a; Horticulture minister Prof. Lalnilawma'n hmanpuiin, Horti-culture department hnuaia officer-te hnathawhṭhat chu hmanrua din leh pawisa hman tam lam (physical & financial achievement)-ah nih loin, an hnathawhte loneitute'n an chhawr ṭangkai danah teh a nih dawn thu a sawi.

Prof. Lalnilawma chuan, MHSA member-te chu loneitute tan suangtuah nei a, tihlawhtling tura hmala ho ṭhin turin a fuih a, "He sorkar tharah hian enge kan hmathlir, enge danglamna thlen tura kan ngaihtuah tih hi a pawimawh. ZPM sorkar policy zinga ei leh bara intodelhah hian kan mawhphurhna a sang bik hle a, chutah chuan eng kalphung thar nge kan lantir ang tih hi kan ngaihtuahnaah awm rawh se," a ti.

Mizorama awmsate hman ṭangkai dan tur an zawng dawn tih sawiin Horticuture Minister chuan, "Kan kal dan ngai pet peta kan kal chuan ngai kan awh anga, hma kan sawn dawn lo. Sorkar lo awm tawhte kan va sawisel a ni lo a, hmalak tumna inang mah se, tuna kan kal dan tur hi a danglam tur a ni," a ti a, result oriented-a kal turin thawktute a sawm.

Minister Lalnilawma chuan, "Appointment delay hi ka duh loa, ni khat pawh hi a uihawm. File pawh ka awm a nih chuan tikhawtlai loin a chhuak nghal zel ang. Office luaha kan awm hian min mamawhtute kan dawngsawng ṭha tur a ni, inti lal tur kan ni lo. Horticulture office-a kan ṭhut chhan hi kut hnathawktute tan a ni," a ti a, kut hnathawktute tana thawhpui nuam leh hawihawm ni turin kalkhawmte a chah.

He hunah hian Horticulture director CH Lalmuanpuia'n MHSA member thar mi pasarih a lawmlut a; MHSA vice president T Vanlalthlana kaihhruaiin kum 2023-24 chhunga an member thi mi pahnihte sùnna hun hman a ni.

MHSA general secretary Lalremruata tarlan danin, Mizoram Horticulture Service-ah hian sanction post 90 a awm a, post 55 hnawhkhah niin, post ruak 35 a awm. Horticulture deputy director Dr Jenny Zoremthangi'n MHSA thupui 'Mizoram Horticulture - in development and way forward' hmangin kalkhawmte thil pawimawh a zirtir a; Mizoram zau zawng sq.km 21,081 aṭangin potential horticulture area hi hectare nuai 11.56 (55%) a nih laiin, tuna horticulture area chu hectare nuai 1.5 (13%) chauh a nih thu a tarlang.