Agriculture hi thar chhuahte hralhna lam tinzawna kalpui tum a ni - Agri. Minister

Agriculture minister PC Vanlalruata hoin nimin khan Agriculture Directorate conference hall-ah Agriculture department hnuaia hmalakna thlirletna leh hmalak zel dan tur sawihona neih a ni. Minister chuan, "Agriculture hi thar tam lam tinzawn (production based) ringawtin a kal a, tunah chuan thar chhuahte hralhna lam tinzawn (market based) hmanga kalpui tum a ni," a ti.

PC Vanlalruata chuan, Market First tia kal chu a hun tawh thu a sawi a, "Agriculture hi kum tam tak chhung thar tam lam tinzawn (production based) ringawtin a kal a, tunah chuan thar chhuahte hralhna lam tinzawn (market based) hmanga kalpui tum a ni. Sorkarin a hralhna tur lam ngaipawimawhin sawhthing, aieng, hmarcha leh hmunphiah hralhna tur sum a dah a, rate mumal tak a duang bawk," a ti a, budget pharh hma ngeiin buhfai rate pawh siama loneitute tana puanzar hman tum a nih thu leh Tung pawh sorkarin a ngaih pawimawh dawn thu a sawi.

Tun hnaia sorkar laipui hotute a kawmnaah buh leh thlai tam zawk thar theihna hmunte cheibawl leh farm mechanisation ngaihpawimawh tum a nih thu sawiin Minister chuan, "Sorkar au hla leh ngaihpawimawh berte zinga mi agriculture tihhmasawn kawngah theihtawp chhuahho a ngai dawn a, hemi tur hian loneitute ṭhahnemngai taka kan thawhpui a ngai. Agriculture hi mipui tam zawkte eizawnna a nih avangin tihhmasawn kawngah ngaihtuahna sèn tlàn a ṭul," a ti.

PC Vanlalruata chuan loneitute hriat chian a ṭul thu te, awmze nei zawka hmalak a nih theih nan Digital Agriculture Mission hmanga hmalak ngaihpawimawh a nih tur thu te, sorkar tharin mimal ni loin society behchhana hmalak a ngaih pawimawh thu te, line department dangte nen thawhho dan tur ngaihtuah tlân a ṭul thu te, sustainable agriculture tihhmasawn tum a nih thu leh compact area-ah awmze nei zawka hmalak tum a nih thu te, dik taka sorkar sum hman leh scheme kalpui a ṭul thute a sawi bawk.,

He hunah hian kum 2023-2024 chhunga DAO, FOCUS, Civil Works, MOVCD, SAS Hnahthial, SAMETI, ATMA, Green Ag, KVK, Oil Palm Seed Garden leh PM Kisan hnuaia hmalakna tlangpui bakah, KY & RKVY hnuaia kum 2023-2024 chhunga Annual Action Plan (AAP & DPR based) leh senso ngai zatte thlirho niin, zirhona aṭangin kum 2024-2025 atana Annual Action Plan duan dan tur leh senso ngai zat tur chungchangte sawiho nghal a ni.