Electric in ên chhâwk a awm tawh lohna turin hma la mek
Power & Electricity department chuan electric current pekchhuah leh hman dan chungchangah mipui hnena hriattirna a tichhuak a; thlasik chhung bik inchhungkhura electric power hmannaah inrenchem lehzual turin mipui an ngen.
Power & Electricity department chuan, tunlaiin power supply khaihlak a awm zauh zauh ṭhin a, kumin thlasik hi kum dang zawng aia a vawh avangin mipuite'n heater etc. an hmang nasa tih a tarlang a, "Hei hi kan electric line leh transformer-in a zo lo ṭhin a, veng ṭhenkhatah in ên chhâwk a ngai ṭhin a ni," a ti a, in ên chhâwk a awm tawh lohna turin theihtawp chhuahin hma an la mek tih a tarlang.
Power & Electricity dept. thuchhuah
▶ Phai aṭanga power supply kan hmuhna pakhat, Luangmual sub station incoming line-ah hian megawatt 70 pelh phal a nih ngai loh avangin thlasikah peak load laiin in ên chhâwk a ngai ṭhin.
▶ Tam zawka power lakluh a nih theihna turin conductor lian zawka thlak mek a ni.
▶ Tlangnuam sub station-a transformer lian overload vanga load shedding ngai ṭhin tih tawp nan transformer lian dang dah belh mek a ni.
▶ Chawnpui sub station-a transformer lian overload chhâwk turin Maumual sub station aṭangin transformer tê (DT) ṭhenkhat chawm ṭhen tum a ni.
▶ Heng hnate hi January, 2024 thla chhungin thawh zawh a ni ang.
▶ Hmun tam taka electric hrui atan bare conductor kan la hman chu hrui dum (ABC)-a thlak vek tum a ni.
▶ Hemi rual hian hrui (service connection wire, LPS, Zonet leh internet cable) kal fel lo zawng zawngte siam rem tum a ni.
▶ Distribution box kâng ṭhinte pawh design thar siamin lei fel tawh a ni.
▶ Distribution box hlui a thara thlak chhungin hun eng emaw chen chu power khaihlak a la awm zel dawn.