Jail tângte chungchang ngaihtuah

Lawngtlai district & session judge Vanlalenmawia kaihhruaiin nimin khan sorkar hotute leh tlawmngaipawl hruaitute'n chief judicial magistrate Vanlalenmawia pisaah jail tâng zinga thubuai ngaihtuah lai (under trail prisoner)-te chungchang leh The Mizoram Victims of Crime Compensation (Amendment) Scheme 2016 hnuaia zangnadawmna dilna lutte an sawiho a; dilna pasarih zinga pahnih an pawm.

Vanlalenmawia chuan, mahni mihringpui leh khawtlang tana hnawksak leh harstana siam, dan bawhchhetute chuan an phu ang tâwk hremna an hmuh ngei theih nan dan an bawhchhia a ni tih finfiahna felfai tak neih a pawimawh thu a sawi a, "Hemi tur hian heng kaihhnawiha thawktu department, tlawmngai pawl leh khawtlang hruaitute inkarah thawhhona ṭha a awm a pawimawh," a ti.

Ṭhahnemngaih luat vanga mimal leh pawl anga dan bawhchhetute dap leh man kawngah dan hnuaia tih theih chin leh tih loh tur chinte hriat a pawimawh thu sawiin Vanlalenmawia chuan, "Sorkar hnuaia thuneitute hmalakna ngaihchan ṭhin a ṭul," a ti bawk.

Ṭhukhawm chuan court-in an chungthu a ngaihtuah mek jail tâng mi pasarihte chungchang leh ‘Victims of Crime Compensation Scheme’ hnuaia zangnadawmna dilna lut pasarihte an ngaihtuah a; zangndawmna dilna pasarih zinga pali chu ngaihtuah ṭhat leh tura tih niin, dilna pahnih pawm a ni a, pakhat chu hnawl a ni thung.

Lawngtlai District Jail-a awm mekte inenkawlna kalpui dan, hriselna dinhmun leh ei leh in pek an nih dante tarlan niin, February, 2024 chhung hian Mental Health Camp neih hman beisei a nih thu tarlan a ni bawk.

He hunah hian chief judicial magistrate Jothansangi, additional session judge F Rohlupuia, district bawrhsap Cheemala Siva Gopal Reddy, SP R Lokeshwaran, DIPRO Hmingthanzuala, judicial magistrate C Lalremsanga, Lawngtlai District Jail superintendent HC Hratliana bakah, YLA leh LWA hruaitute an tel a ni.