MJA Siaha District Annual Conference

Mizoram Journalist Association, Siaha district chuan nimin khan IPRO conference hall-ah annual conference vawi 39-na an hmang a; Mara Autonomous District Council executive member Beirahmo syhly-in a hmanpui.

Inkhawmpuiah hian Siaha district MJA president M Baithai kaihhruaiin rorel inkhawm neih a ni a, resolution pahnih - 'Mizoramah kalphung thar, mipui sorkar Pu Lalduhoma kaihhruai a lo piang hi lawmawm kan ti a, Mizoramah rorelna dik, hmasawnna rualkhai tak, kan hnam leh sakhua vawnghim chunga a kal kan beiseiin chutianga an hmalaknaah chuan MJA Siaha chuan sorkar chu a ṭawiawmin a thlawp tlat zel dawn a ni,' tih leh ' Mizoram sorkar Power & Electricity department hmalakna leh ruahmanna kal mek, Siaha 132KV line hi a ranglama tihpuitlin a nih theih nan Mizoram sorkarin chak takin bawhzui rawh se,' tihte an pawm.

Siaha IPRO kaihhruaiin kum 2024-26 chhunga Siaha district MJA president atan CZ Hluna, vice president atan Jeffrey Khara leh treasurer atan V Pawhlate bakah, executive member panga thlan an ni. Tlaiah conference lawmna ruai an kilho nghal a ni.