Mizorama Covid-19 dinhmun

August 18, Thawhleh­ni khan Mizoramah Covid-19 hripui vei mi 40 chuang hmuh chhuah leh a ni.

Mizorama hripui kai hmuh chhuah tawh, Indian Council of Medical Research (ICMR)Portal-a thun tawh zat chu mi 860 an ni a, nimin khan State Referral Hospital aṭangin mi panga - (mipa pali leh hmeichhia pakhat) chhuahtir niin, chhuahtir tawh zat hi mi 384 an ni.

Nimin tlai dar 5 thlenga Mizorama Covid-19 vei hmuh ICMR data portal-a thun tawh zat chu mi  860 an ni a, Vairengte checkgate-a Rapid Antigen Test  (RAT) hmanga hripui vei hmuh chhuah la ziah luh loh eng emaw zat an awm.

Hri pui kai mi 860 zinga 384 (44.65%) chu chhuahtir an ni tawh a, la chhuak lo mi 476 (55.35%) an awm a; la chhuahtir loh zingah Co­vid-19 negative tawh an awm nual. Thawhlehnia Mizorama Covid-19 vei hmuh chhuahte chu - ZMC laboratory aṭangin mi 30, Lunglei Civil Hospital (LCH) laboratory-ah mi pakhat leh, RAT) hmanga mi 327 endik aṭangin Vairengte checkgate-ah mi 14 an ni. Hengte hi ICMR data portal-a thun tawh chin a ni.

August 18, Thawhlehnia ZMC-a hripui vei hmuh chhuahte chu mipa 15 leh hmeichhia 15 an ni a, Aizawl district mi 21, Lawng­tlai district-a mi paruk leh Mamit district-a mi pathum an ni. Taksaa harsatna nei (Covid-19 symptom lang) an awm lo.

Aizawl district-a Covid-19 vei hmuh tharte chu mipa 12 leh hmeichhia pakua an ni a, kum 20-54 inkar an ni. An zinga mi 24-te chu quarantine facility-a awm mek niin, an zingah sipai pathum an tel. Mi dang paruk - hmeichhia panga leh mipa pakhatte erawh chu Mizorama mi dang aṭanga kai an ni a, hmeichhia pali chu quarantine facility thuhmuna awm niin, an inkhungna aṭanga kai nia hriat a ni. Pahnih erawh chu positive contact vanga mahni ina khung hran mek Venghnuai pa kum 54 mi leh Chaltlang Lily Veng nu kum 46-a upa an ni.

ZMC-a Lawngtlai district-a mi hripui vei hmuh chhuah thar parukte chu mipa pahnih leh hmeichhia paruk, kum 19-23 inkar, Delhi aṭanga rawn haw an ni a, quarantine facility-a awm lai an ni. Mamit district-a mi pathumte chu mipa pakhat leh hmeichhia pahnih, Delhi aṭanga haw vek an ni a, naupang kum 12 pakhat a tel. LCH laboratory-ah True­NAT-PCR hmangin hripui vei mipa pakhat, kum 27 mi hmuh chhuah a ni a, August 10, 2020-a Jharkhand aṭanga rawn lut, BRN company-a thawk, qua­rantine centre-a awm mek a ni.

August 18 khan RAT hmangin Aizawl, Champhai, Kolasib, Serchhip leh Mamit­ahte swab sample endik a ni a, Covid-19 vei Kolasib district-ah mi 14 hmuh chhuah niin, khaw dang zawngah hmuh a ni lo.

Kolasib district-a hmuh chhuahte hi Vairengte checkgate-a hmuh chhuahte an ni a, kum 20-50 inkar, hnam dang driver/handyman vek niin, Assam, Haryana leh Jharkhand state mite an ni. Vairengte checkgate-ah hian Assam lam aṭanga lo lut turte swab sample endiknaah Covid-19 vei hmuh chhuah belh an awm zel a, hmuh chhuah thar zinga eng emaw zat chu ICMR-ah thun luh a la ni lo thung.

Vairengte-ah hian August 17, Thawhṭanni tlai dar 5 leh August 18, Thawhlehni zing dar 5 inkarah Covid-19 vei mi paruk hmuh chhuah a ni a, August 18 chhunah  mi 10, zanah mi pahnih, leh niminah tlai dar 5 thlengin mi 10 hmuh chhuah leh a ni bawk.

Vairengtea hripui vei hmuh tawh zawng zawng chu mi 79 an ni a, chu'ng zinga 78 chu hnam dang driver/handyman an ni.