Armed Venga lei tlakhniam ṭhinna tlawh

Aizawl East-II bialtu MLA B Lalchhanzova, minister of state chuan nimin zing khan a bial chhung Armed Venga lei tlakhniam ṭhinna hmun a tlawh a, hnathawh dan tur a enfiah.

B Lalchhanzova chuan amah ṭawiawmtu bialtu corporator Christina Roluahpuii Sailo, UDPA engineer leh Armed Veng Local Council hruaitute'n an ṭawiawm.

East-II Bialtu MLA chuan lei tlahniam ṭhin avanga mipui tawrhna chu pawi a tih thu sawiin, "He harsatna chingfel tur hian theihtawp kan chhuah dawn. Hmalakna kal mek pawh ṭha taka kalpui ka duh a, a aia ṭha zawkin ruahmanna kan siam ang. Sum sen tur hi hautak deuhin vawi khatah thleng thui thei lo mahila, kan chhunzawm zel dawn," a ti.

A hmuna hnathawh dan tur an enfiah zawhah Armed Veng Community Centre-ah Armed Veng LC chairman K Lalfakzuala kaihhruaina hnuaiah hmalak zui zel dan tur sawiho nghal a ni.

Aizawl East-II Bialtu MLA hian nimin zingah vek khan Dawrpui Thlanmuala leimin mai theihna hmun a tlawh nghal a, UDPA engineer-te nen fur lo thlen hmaa siam a nih theih nan rua­hmanna an siam nghal.

B Lalchhanzova chuan Chhinga Venga anganwadi centre bul tuihawk luankawr tê lutuk fur laia bawlhhlawhin a hnawh reng ṭhin pawh a enfiah a, furpui thlen hma-a siamṭhat dan tur UDPA engineer-te nen an sawiho.