Zangnadawmna hmuh theih nan theihtawp chhuah zel an tum

National highway no. 6 siam hna thawk meka package-III huamchhunga ram nei, kawng laihin an ram a tihchhiat zangnadawmna la dawng lote chuan an dawn ngei theih nan theihtawp chhuaha hmalak an tum.

Vanglaini thudawn danin package-III hi Tuisenphai-Tuipui inkar a ni a, ram neitute chu tunhnai khan inhmukhawmin, kawng laihin an ram a tichhe tawh chunga tun thlenga zangnadawmna engmah an la dawng lo chu rilru nat thlak an tih thu an sawi.

Ram neitute chuan, "Kan chanvo dik tak, kan sum dawn tur kan dawn ngei theihna tura hmala turin thuneitute kan phut a ni," an ti.

Zangnadawmna sum an dawng thei lo hian chhan a nei ngei dawn tih a hriat thu sawiin ram neitute chuan, "Kan ram tihchhiatna-a mawhphurtu hi zawng chhuak a, hremna pe ngei turin thuneitute kan phut," an ti a, an thilphut hi a hlawhtlin hma chuan kawngpui dan chah thleng pawhin hma an lak dawn thu an sawi.