KHAWTHLIR

CM Relief Fund

ZPM Zonu, Chawlhhmun Unit chuan nimin khan chief minister Lalduhoma hnenah Chief Minister Relief Fund atan Rs 10,000 an hlan.

Learning Centre

Higher and Technical Education minister Dr Vanlalthlana chuan nimin khan Republic Venga Institute of Advanced Studies in Education (IASE)-ah New Age Learning Centre thar a hawng a, "Khawvel changkang zelah kan thiamna leh kan resource neihte kan puntir ve zel a ngai. IASE-a zirtitu ni tura zir mekte'n tun aṭangin rinawmna leh inpekna in neih a ngai," a ti. New Age Learning Centre hi ICT Based Library resource hmunpui a ni a, UDPA dept. hnuaia Aizawl Smart City Ltd. bultuma din a ni.

Pisa luah

Zoram Infrastructure and Industrial Development Corporation Ltd. (ZIDCO) chairman atana ruat thar JK Dawngzuala leh Mizoram Food & Allied Industries Corporation Ltd. (MIFCO) chairman atana ruat thar Lalṭhazuala Royte-te chuan nimin aṭang khan an pisa an luah ṭan.

Deworming Day sawiho a ni

Nimin khan Kolasib District Co-ordination Committee on National Deworming Day chu Kolasib sr. CMO Dr RK Lalthlamuana hoin an ṭhukhawm a, National Deworming Day (NDD) First Round 2024 kalpui dan tur an sawi ho. National Deworming Day hi kum tin vawi hnih, February leh August-ah hman ṭhin a ni a, kuminah chuan first round hi February 9 aṭanga hman ṭan tura ruahman a ni. Naupang kum 1 aṭanga kum 19 inkarte chu rulhut hlo (Tab. Albendazole) eitir vek tur an ni.

Kângmei ven hapta sawiho

Saitual District Level Committee on Fire Prevention chuan nimin khan an chairman Dr Lalngura Tlau, bawrhsap hoin kângmei vèn hapta hman dan tur an sawiho a; khaw tinaah Fire Prevention Week hi BDO leh VC-te kaihhruaina hnuaiah neih ni se, an ti. Kângmei vèn kawnga ti ṭhate hnena lawmman pek chungchang an sawiho bawk.