VC/LC inthlan hun sawn turin Lal Thanhawla'n SEC a ngen
Mizoram Pradesh Congress Committee (MPCC) president Lal Thanhawla chuan nimin khan State Election Commissioner (SEC) hnenah lehkha thawnin, village council (VC) leh local council (LC) inthlan hun sawn turin a ngen. A ngenna lehkha hi Chief Minister leh Chief Secretary a pe tel nghal.
Congress President chuan, SEC-in VC leh LC inthlan a puan ní-ah Covid-19 vei mek Mizoramah mi 222 an awm thu tarlangin, "August 19 thleng hian hri vei mek chu 400 chuangah a pung chho a ni. Chubakah, khawi aṭanga kai nge (source) tih hriat hleih theih lohin Covid-19 vei an awm ta nual mai a, local task force hrang hrangin an veng an lockdown a, Mizoram sorkar pawhin August 17-21 zing dar 4:30 thleng AMC huam chhungah total lockdown a puang a ni," a ti.
Mizoram mipuite chu a hma zawng aiin Covid-19 lakah kan him lo tih a lang chiang hle tih tarlangin Lal Thanhawla chuan, "Sorkarin AMC area-a total lockdown a puan mek lai pawhin veng hrang hrangah contact tracing tih ngai a pung nasa hle," a ti a; inthlan ní, August 27, 2020-ah pawh contact tracing tih ngai leh swab sample test result nghak mek an la awm dawn avangin, chu'ng mite chuan duh hle mah se, khua leh tui an nihna angin vote an thlâk theih a beisei awm loh thu a tarlang.
MPCC President tarlan danin, Covid-19 contact tracing a harsat avangin mipuiah phílí buaina leh chiainate a thleng mek a, sorkar inrêlbàwlna thlengin a buai pawh a hlauhawm tawh. Vote thlak tura mi tam tak an kal khawm chuan, August 2020 thla chhunga Mizorama Covid-19 inkaihhruaina kenkawh theih a ni dawn lo. Mipuia inkai darhna (community spread) nasa tak a thlen theih avangin mipui hriselna mai bakah, a chhe berah thihna hial thleng thei a ni.
Lal Thanhawla chuan, The Lushai Hills District (Village Council) Act, 1953 (as amended in 2014) Section 5-in a sawi angin, VC term chu thla 18 thleng pawhsei theih a nih thu tarlangin, "LC hi act leh rules-ah pawisei theihna awm lo mah se, Covid-19 hri léng vangin sorkarin a duh dan angin a pawtsei mek tho. Kan hun tawng mil zelin VC leh LC inthlan hi a ṭul chin chin tikhawtlai turin ka rawn ngen a ni," a ti.
Congress party President hian, a ngenna chu politics rawng kai a ni lo a, mipui himna tur leh mipui hmakhaw ngaih vang a ni tih hriatsak a, tihhlawhtlinsak turin SEC chu a ngen a ni.