Covid-19 positive contact vangin Aizawlah swab sample lâk zel a ni

August 18, Thawhlehnia ZMC Covid-19 Labora­tory-a hripui vei hmuh chhuah zingah Mizoram chhunga mi dang aṭanga kái chhâwng, quarantine facility-a awm lai ni lo pahnih an tel a; hei vang hian an kài chhàwn theih awma ngaihte an awmna venga local task force (LTF)-te'n an chhui zui a, nimin khan mi eng emaw zatte swab sample lâk nghal a ni.

Covid-19 ZMC-a hmuh chhuah thar, positive contact aṭanga kai pakhat chu Chaltlang Lily Veng nu kum 46 mi a ni. Chaltlang Lily Veng LTF hruaitute hnen aṭanga thu dawn danin, an vengah hian Thawhlehni zan khan mi 37-te swab test result a chhuak a, hripui vei hmuh chhuah thar chu a hmuh chhuah tawh mipa naupang kum 11 mi nena khawsa ho, a nu a ni. Chaltlang Lily Veng LTF hruaitute chuan, hripui vei pakhat hmuh chhuah belh a nih avang hian an vengah contact tracing tih belh ngai a awm a, nimin khan swab sample lak belh tur tlem azawng awmte chu lak beisei a nih thu an sawi.

Lily Veng LTF hruaitute sawi danin, an vengah hian Covid-19 kai mi 16 an awm tawh a, pakhat chu state páwn aṭanga rawn haw sipai a ni a, enkawlna hmun aṭangin dam takin a chhuak tawh. Mi dang 15-te erawh chu Mizoram chhunga mi dang aṭanga kai an ni a, a inṭanna chu - BSF sipai ho dah khawmna quarantine centre - NIELIT-a security duty police, Lily Veng miin a kài aṭangin a ni. Thawhlehnia Covid-19 vei hmuh chhuah zingah Venghnuai, Aizawla mi pakhat a tel a; Mizoram sorkarin a phal tawh angin Venghnuai LTF chuan hripui vei hming hi nimin zing khan an puangzar nghal.

Venghnuai LTF thuchhuak chuan, Thawhlehni zan aṭangin contact tracing tih nghal a ni a, fimkhur taka hmalak mek a ni tih tarlangin, "Veng mipuite páwnchhuak lo tur leh sorkar leh LTF ruahmanna zâwm turin kan inhriattir leh a ni," an ti a; mahni ina inkhung mekte chu inkhung chhunzawm a, fimkhur tura awm turin an chah. Venghnuai LTF secretary V Malrosanga chuan Vanglaini palai zawhna chhangin, an vengah chhungkaw 44 chu mahni inah an inkhung mek tih a sawi a, "Tuna case kan neih chin angah chuan contact tracing kan ti zo rih a, vawiin (nimin) hian mi 21-te swab sample lak a ni.

Mi 74 dang sample lak leh tura ruahman a ni a, mahse, nghah deuh a la ngai," a ti. An veng pa hripui vei ta chu Focus Photo Express-ah a kal bakah, a neitute nen in lamah pawh an intlawhpawh ṭhin tih a sawi bawk. Hetih lai hian, Covid-19 a darh theihna hmuna ngaih Darlawn leh Sâwleng khuaa swab sample lak zingah mi ṭhenkhatte result hriat a ni tawh a, hripui kai an awm belh rih lo.