Sorkar thar hnuaia hnathawhte chu a hun takah zawh tum tur - CM

Nimin khan chief minister Lalduhoma hoin CM meeting hall-ah Pradhan Mantri Gram Sodak Yojana (PMGSY) hna­thawhte thlirletna (review), Mizoram châk lâkna kawngpui Vairengte leh Sairang inkar kawng chhe zual thawmṭhat vat dan tur leh four lane tura hnathawh ṭan thuai dan tur ngaihtuah a ni.

Meeting-ah hian PWD minister Vanlalhlana, adviser to CM TB Lalvenchhunga leh a kaihhnawih official-te an tel a; Chief Minister chuan sorkar thar hnuaia hnathawhte chu a hun taka zawh ngei tum tur a nih thu a sawi.

Lalduhoma chuan, sorkar thar awm hmaa PMGSY hmalakna vawiin thlenga thawh, a huna zawh hman loh tur nia langte chu chak taka thawhtir turin offical-te a chah a, "Sorkar thar kan neih hnua hnathawhte phei chu a hun taka zawh ngei kan tum tur a ni," a ti.

PWD minister Vanlalhlana chuan Vairengte leh Sairang inkar kawng repair a ṭul tawhzia te, mipuite mamawh phur ṭhin truck neitute pawhin Chief Minister hnenah an thlen tawh thute leh fur a lo thlen leh mai dawn avangin hmanhmawh a ṭul thute a sawi.

NHIDCL hotute chuan, an chanpual chinte chu fur hmaa a ṭulzual an khawih theih tur thu an sawi a, "Forest clearance a fel chuan four lane thawh ṭan nghal a ni ang," an ti.

PWD hotute chuan an enkawl chin chu a chhiat lutuk loh thu leh a ṭul zual lai an khawih nghal tur thu an tarlang. Council of Minister meeting in a ngaihtuahzui ngai thilte chu Council of Minister meeting neih leh hmasabera agenda atan dah hman an tum bawk.

Meeting-a tarlan danin, PMGSY version 1 hmangin kawngpui 345 (km. 4,288) sial a ni a, an zinga 43 chu la zawh fel loh a ni. Version 2 hmangin kawngpui 6 (km 194) pavement leh repairing thawh a ni a, panga hi la zawh fel loh a ni.

Tunah hian version 3 a lo chhuak leh tawh a, hmun 17-a upgradation leh improvement thawhna tur a ni ang.