AIR, Aizawla dawt hmanga thil ti mi pathum thiam loh chantir an ni

Aizawl District Court-a special judge (Prevention of Corruption Act) Dr HTC Lalrinchhana chuan All India Radio (AIR), Aizawl Station-a dawta mi chhawr anga insawi leh music artist-te dawt hmanga hla record anga tarlang a, sum eirutu mi pathum thiam loh a chantir.

Court thutlukna-a tarlan a nih danin, January 2012 aṭanga June 2012 inkar khan chutih hun laia AIR, Aizawl Station-a asst. director Zosangzuala, programmme executive Lalnunziri leh LDC Judy H Lalmuanpuii te chuan casual production assistant-a AIR, Aizawl Station-a thawk tur angin mi 20 an ziak fel a, a tak takin chhawr an ni lo thung.

Mi 20-te hi casual production assistant-in ṭum 54 chhawr anga ziah a ni a, an hlawh atana sorkar pawisa kal ral zat chu cheng nuai 2.60 a ni.

An pathum vêk hian music artist 39 chu hla record angin an tarlang a, an record tak tak lo thung. Hemi atana sum kal ral chu cheng nuai 6.08 a ni.

Heng atan hian AIR - Directorate, Akashwani Bhawan, New Delhi-in budget estimate 2011-2012 atan AIR, Aizawl hnenah North East Special Package (NESP) hnuaia cheng nuai 8 leh Payment for Programme and Special Services of IEBR hnuai aṭangin cheng nuai 86.73 khawihchingpena puh an ni.

Special Court chuan he thubuai chhuitu CBI thuhretu mi 49 an neih bakah lehkha leh ṭul dang 1,154 zet an nei. Special Court chuan thuhretute thusawi leh document hrang hrang aṭangin Judy H Lalmuanpuii, Zosangzuala leh Lalnunziri te thiam loh a chantir ta a ni.

Thiam loh chantir an nih angin bail leh bond lo awm te sût (cancel) sak an ni a, jail-ah dahluh nghal an ni. February 5, 2024 chhun dar 12-ah court chuan hrem an nih dan tur a puang ang.