Thla 1 chhunga dan bawhchhiate pawisa chawi nuai 6 chuang a ni

Aizawl District Transport Office (DTO) hnuaia enforcement staff-te chuan January, 2024 chhung khan lirthei dan bawhchhia mi 185 an man a, an hremna sum chawi tir zat tlingkhawm chu cheng nuai 6 chuang a ni.

Enforcement staff-te hian January chhung khan lirthei chi hrang hrang 725 an endik a, heng zinga 185 hian dan bawhchhiain, danin a phut angin hrem an ni. Hremna sum chawi tlingkhawm hi Rs 6,86,000 a ni.

Lirthei dan bawhchhia zingah bungraw phur lirthei tê (light goods vehicle) an tam ber a, 53 niin; passenger phur maxi cab 41 an awm. Heavy goods vehicle 23 leh private lirthei - LMV 34 an awm a; two wheeler 14 bakah excavator 7 a tel bawk. Lirthei chi dang erawh tam tham an ni lo.

Lirthei an man zinga a tam ber hi chhiah chawi tur ang pe lo, insurance thi tawh leh leh vehicle fitness-a tling lo te a ni.

Lirthei dan bawhchhia, tlan tlang emaw, a hmuna chawi nghal thei lo, e-challan hmanga an registration an tihtawp sak lailawk 11 an awm. Heng ho hremna atana sum chawi tur hi a vaiin Rs 12,25,500 a ni.

Aizawl DTO hotute chuan kum tling lo lirthei khalh tir lo turin lirthei neitute an ngen nawn leh a, "A khalhtirtu leh a khalhtu hremna thuhmun reng a ni," an ti.