PM SVANidhi a hlawhtlin theih nan Sorkarin hma a la zel dawn - Dy. CM

Union Minister for Housing & Urban Affairs Hardeep S Puri hoin August 18, Thawhlehni tlai dar 4:30 khan video conferencing hmangin meeting neih a ni a, UDPA enkawltu deputy chief minister Tawnluia chuan, Mizoramah hlawhtling taka PM SVANidhi scheme kalpui a nih theih nan Mizoram sorkarin hma a lâk zel tur thu leh mi 28 hnenah loan pek a nih tawh thu a sawi.

Hardeep S Puri chuan, Covid-19 léngin khawlaia thil zuar leh inpho (street vendor)-te eizawnna nasa taka a nghawng avang leh inkhàrkhip a nih hmaa an sum khâwlte inkhàrkhip chhunga an hman ral tawh avanga eizawnna bul an ṭan leh theih nan sorkar laipuiin July 25, 2020 aṭangin PM SVANidhi a kalpui thu a sawi.

Union Minister sawi danin, street vendor-te’n leirem an rah theihna turin PM SVANidhi kaltlangin working capital loan Rs. 10,000 thleng pek tura duan a ni a, loan la tur tan guarantor a ngai lo. State lian - Maharastra, Uttar Pradesh, Bihar-ahte chuan mi tam takin intundin nan an hmang tawh a ni.

Dy. CM Tawnluia chuan, Covid-19 lên laia Union Minister-in street vendor tana scheme pawimawh tak PM SVANidhi video conference kaltlanga meeting a ko chu lawm­awm a tih thu a sawi a, "PM SVANidhi hi Mizoramah hlawhtling taka hman a nih theih nan UDPA department chuan survey uluk takin a nei a ni," a ti.

Khawpui chhung khawlaia thil zuarte leh inpho mi 2,777 chhinchhiah an ni tawh tih sawiin Tawnluia chuan, "Smart certification pawh pek an nih tawh a, mi 2,777 zinga 334-te'n PM-SVANidhi hnuaiah loan an dil tawh. PM SVANidhi a hlawhtlin theih nan Mizoram sorkar chuan hma a la zel dawn a ni," a ti a, mi 28 hnenah loan pek a nih tawh thu a sawi.

Mizoram chu hun rei lote chhungin loan pek percentage sanna ber dawttu state a nih thu sawiin Tawnluia chuan, "India ram hmun ṭhenkhata street vendor-te'n harsatna an neih ang em em chu Mizoramah a awm ve lo. A chhan chu Home department-te nena lung­rual taka thawhhona vang a ni," a ti.

Dy. CM hi UDPA secretary Dr C Vanlalramsanga, IGP (Law & Order) LH Shanliana leh AMC commissioner K Laldingliana ten an ṭawiawm a ni.