State Level Veer Gatha Winner hlan

School Education dept. buatsaihin nimin khan State Level Veer Gatha Winner zirlai pariat hnenah lawmman hlan a ni a; School Education secretary Dr Lalzirmawia Chhangte, Veer Gatha state project director ni bawkin certificate leh Rs 8,000 ṭheuh a hlan a ni.

Lawmman hlanna inkhawm School Education Directorate conference hall-a neih hi School Education director Lalsangliana'n a kaihruai a; khuallian Dr Lalzirmawia Chhangte chuan, sorkar leh department hmalakna hrang hrang leh Veer Gatha Project ngaihtuah ringawt pawhin national language thiam pawimawhna a lang hle tih a sawi a, "Hmalakna hrang hrang report leh portal & website-a upload ṭhat leh documentation atan ṭan lak zual deuh deuh a ṭha," a ti.

Veer Gatha hi sorkar laipui Ministry of Defence leh Ministry of Education-te thawhhonaa kalpui niin, India rama mi huaisen chawimawina dawng tawhte ngaihhlut an nih theih nan leh sikul naupangte'n huaisen taka ram leh hnam hmangaihna thinlung an put theih nana story writing, paragraph writing, poem, painting, multi-media presentation hmanga zirlaite inelna a ni.

Kumin hi Veer Gatha 3.0 niin, a ṭum 3-na a ni a, Mizoram chu a tel vawi khatna a ni thung. Project Veer Gatha version 3.0 hi pawl 3-12 zirlaite tana buatsaih a ni a, category 1-ah pawl 3-5, category 2-ah pawl 6-8, category 3-ah pawl 9-10 leh category 4-ah pawl 11-12 zirlaite an inel a ni. Aizawl, Lunglei, Champhai, Kolasib, Mamit leh Saitual district-a sikul 100 aṭangin zirlai 207 an tel.