Sum indaih lo hle mah se, buh leh thlai chawmna tur tuilakna ṭha siam turin hma kan la zel - IWR Minister

Irrigation & Water Resources (IWR) minister PC Vanlalruata chuan February 1, Ningani khan IWR department Chief Engineer conference hall-ah IWRD hnuaia thawkte hmalakna leh hmachhawpte a sawipui a; sorkarin sum indaih lo hle mah se, buh leh thlai chawmna tur tuilakna ṭha siam turin hmalak zel a nih tur thu a sawi.

PC Vanlalruata chuan, kut hnathawktute hmasawn nan theihtawp chhuah turin kalkhawmte a chah a, "Sum indaih lo hle mah se, buh leh thlai chawmna tur tuilakna ṭha siam chu sorkar flagship programme pakhat a nih avangin mamawh zualpui ang angte hnawh khah a nih theih nan hmalak zel a ni," a ti a; thawktu indaih lohnate pawh a ziaawm theih nan hmalak mek a nih thu a sawi.

IWRD hnate chu hun bi neia thawh ngai a nih avangin a hun taka hna thawh zung zung a pawimawh thu sawiin Minister chuan, "Department mai piah lamah ram pumin hma a sawn zel theih nan central aṭanga sum haichhuak thei turin project ṭha leh chhenfakawm turte duan a ṭul a, ram tan theihtawp chhuah zel ang che u," a ti bawk.

He hun hi IWR secretary Dr H Lalthlangliana'n a kaihruai a; PMKSY, NABARD RIDF leh Scheme pawimawh hrang hrang hnuaia hmalakna kal mekte leh hmachhawpte sawiho a ni. Minister hian IWRD pisa hmunhma leh laboratory-te a enfiah nghal a ni.