World Wetlands Day 2024 hmang

Nimin kha World Wetlands Day 2024 a ni a, Mizoram EIACP Hub-Mizoram Pollution Control Board (MPCB) leh Govt. Zirtiri Residential Science College (GZRSC) Eco-club, Department of Botany & Zoology ṭangkawpte buatsaihin Durtlang Leitana GZRSC Hall-ah hun hman a ni a; Mizoramah Wetlands 88 vel a awm thu tarlan a ni.

Mizoram EIACP Hub programme officer Benjamin Lalnunsanga Colney chuan, kum 1997 aṭangin kum tin February 2 chu ‘World Wetlands Day’ atan hman ṭhin a nih thu a sawi a, "Mizoramah Wetlands 88 vel a awm a, chu'ng zinga langsar zual leh tlawhtu ngah zual - Ṭam dil, Palak dil leh Tlawng luite chu vawng thianghlima tibawlhhlawh lo turin ṭan kan lak a ngai, " a ti a, wetland-te vawnhim leh humhalh nan a vela ramngawte zuaha thingphun uar a pawimawh thu a sawi.

He hunah hian GZRSC-a Zoology associate professor Dr Lalzahawmi Chenkual-in Wetlands pawimawhna te, Wetlands chhe tur leh tlem zel tur venhim leh humhalh dan tur leh Mizorama Ramsar Site - Palak dil chungchang zirchiannate a sawifiah a ni.