Thâ leh bungrua hmanga sikul puihna scheme zirho

School Education minister Dr Vanlalthlana hoin February 1, Ningani khan School Education Directorate conference hall-ah sikula thawk ni lote'n pawn lam aṭanga thâ leh bungrua hmanga sikul an puihna tura duan, Vidyanjali Scheme kalhmang zirhona neih a ni. Vidhyanjali hnuaiah sorkar sikul leh Aided School 2,855 zinga 2,678 (93.80%) an inziak lut tawh.

Dr Vanlalthlana chuan, zirna sikul atana mipui chêttirna tur Vidyanjali scheme a awm chu ṭha a tih thu a sawi a, "Vidyanjali scheme hnuaiah hian mipuite'n thâ an thawh theih dan inhrilhhriat a, he scheme hi a hlutna leh pawimawhna kan hriat tlân a ngai," a ti a, sikul tana mahni remchan dan ang anga thâ thawh emaw, ṭanpuina pete chu lawmthu sawi nan ngaihhlutna certificate pek ṭha a tih thu a sawi.

Education secretary Dr Lalzirmawia Chhangte pawhin thu sawiin, "Mipuiin neitu nihna thinlung an put leh thâ an thawh hi central sorkar hian a duh. Tun hmain khawtlangin sikul an din a, building an sa a, zirtirtu an ruai a, neitu an ni hliah hliah a, tunah pawh hian mipuiin mahni theihna ang anga thâ leh bungrua kan pek zel theih chuan mipuiin zirna hi an ta neih leh zual ang a, zirnain a ṭhatpui dawn a ni," a ti.

He huna tarlan danin, tun dinhmunah Vidhyanjali hnuaiah sorkar sikul leh aided school 2,855 zinga 2,678 an inziak lut tawh a; sikul ṭanpui tura inziak lut mi 759 an awm tawh. Sikul hnenah bungrua chi hrang 917 pek a ni tawh a, thâ thawh pawh 255 a awm tawh a ni.

Vidhyanjali hmang hian thâ leh bungrua eng pawh sikul tana ṭangkai tur hmangin ṭanpuina pek theih a ni a, pawisaa ṭanpuina pek erawh a huam lo thung.