Sorkar khalhngiltu kan ni dawn - MPCC Vice President

MPCC chuan nimin khan Congress Bhavan-ah political session an nei a, thusawitu MPCC vice president Lalnunmawia Chuaungo chuan sorkar khalhngiltu an nih dawn thu a sawi.

Lalnunmawia Chuaungo chuan, Assembly House chhungah mai ni lo pawnlamah te, ni tina khawsak kawngahte sorkar khalh ngiltu an nih dawn thu sawiin, "Congress party hi keimahni inchhêk arbawmna tur ni loin ram leh hnam, mipuite tana thawktu kan ni. Ram rawngbawlna kawngah theihtawpin ṭan kan la chhunzawm zel dawn," a ti.

Hun a inthlak danglam a, mipuite mamawh leh duhthu samte pawh a inher danglam tih sawiin MPCC Vice President chuan, "Mipuite beisei leh duh dan, an lungkham ram an thlenna tura an duhte kan hriatthiam a, kan zuk address chat chat theih a pawimawh a ni," a ti a, party mal supporter-te vote ringawtin sorkarna siam turin a tlin theih loh thu a sawi.