ZPM hi an insawi anga an awm loh chuan kan nawr nek mai dawn - MNF Adviser

MNF chuan nimin khan an pisa-ah chhung inkhawm an hmang a, thusawitu MNF adviser K Laldawngliana, MLA chuan, ZPM sorkar chu an insawi anga an awm loh chuan an nawr nek tur thu a sawi.

K Laldawngliana chuan, Assembly Session neih zawh takah ZPM sorkarin 'opposition leh ruling bial kan thliar lo ang' an tih thu sawiin, "A lawmawm hle. Kan lo thlir zel ang a, kan ṭawngṭai pui zel bawk ang. An sawi anga an awm loh erawh chuan kan nawr nek mai dawn a ni," a ti.

'Intodelhna tura kalphung thar hi eng tak ni maw' tiin MNF Adviser chuan, "Beiseina sang tak nen mipuiin an thlir. Chief Minister adviser an dah ṭeuh maite hi kalphung thar ṭha zawk a ni nge, an ṭangkainate kan lo thlir zel dawn," a ti a, ZPM kaihhruai sorkar ṭha taka ke pen zel turin duhsakna a hlan.

MNF Adviser chuan MNF chu hnam thuthlung kengtu a nih thu sawiin, "Martar-te thisena din, Mizo tawh phawt awmna tur a niin ka hria. Kan ram hi tluchhe vek, politician leh sorkar hnathawk zawng zawngte corrupt em em veka tuten emaw an puh hi chu thil dik lo tak a ni tih ka sawi duh," a ti.

ZPM sorkar chu Pathian remruatah pawm ṭheuh tur a nih thu sawiin, "Congress tel lo leh MNF tel lo sorkar tiin an inzuar a, Congress leh party dang aṭanga bang chuang si lo, party hrang hrang khan enchhin tiin an vote pui nasa hle. Kan lo enchhin zel dawn," a ti a, an la rei loh avangin sawisel leh puhmawh vak hun a la nih loh thu a sawi.