Kum nga bak ZPM sorkar ring lo

Congress sorkar laia minister hlui Zodintluanga Ralte chuan January 1, Ningani khan Saitual, Khawzawl leh Champhai tlangdung tlawhin, Congress party hruaitute nen an inkawmnaah kum nga bak ZPM an sorkar dawn loh thu a sawi.

Mizoramah party pathum kalphung a awm tâk avangin mipuiin duhthlan tur an ngah tawh tih sawiin Zodintluanga chuan, "Mipui thikthu a chhe tawh hle. ZPM hi kum nga bak an sorkar lo ang. ZPM hian an sorkar tirh phat aṭangin an key an la sang em em a, an intiam nasat em avangin mipui thikthu a chhe hle dawn. Thutiam hlen theih loh tur tam tak an neih avangin kum nga bak an sorkar dawn lo," a ti.

Zodintluanga chuan, kum nga hnuah chuan Mizoram mipuite'n Congress-ah bawk rinna an nghat leh dawn tih sawiin, "Chumi tur chuan Congress party mipuite leh a hminga hruaitute'n ngaih­tuahna thar leh fim zawk kan hman a ngai," a ti a, khawvel chang­kang leh ngaihtuahna thar zawk lo chhuak mila Mizoram hmasawnna kalpui theih dan tur ngaihtuah a ṭul thu a sawi.