Dawt sawi sim turin Congress hruaitute ngen

ZPM Ṭhalai chuan thuchhuah siamin, Congress party hruaitute chu dawt sawi ṭhinah an puh a, sim turin an ngen.

ZPM Ṭhalai chuan Congress party hruaitute'n ZPM-in BJP aṭanga ṭanpuina dawng anga sawiin mipui rilru hruai kawi an tum niin an tarlang a, "Pawi kan ti hle. Congress party sr. vice president Pu Lal Thanzara'n January 19, 2024-a an party political session-ah leh Congress MLA Pu C Ngunlianchunga'n January 30, 2024-a Siaha Congress Bhavan-a a thusawiah ZPM-in BJP aṭanga ṭanpuina dawnga ngaih theih turin thu an sawi a, sim tawh se kan ti hle," an ti.

MLA inthlanpuiah BJP leh ZPM sawi kawp chuan mipuiah awmzia a nei lo tih tarlangin ZPM chuan, "Vote an hmuh tam phah lo tihte hmuthiam turin kan chah. Congress party inthlan a hnai a, a mimal ang pawhin theihtawp chhuah hunlai a ni tih kan hriatthiampui a, chutihrual chuan politics kalphung hlui-a dawt hmanga inbeih bansan se kan duh," an ti a, Congress party hruaitute chu thudik auchhuahpui tawh turin an ngen.