Finfiahna a awm ṭhat loh ṭhin avangin dan anga hmalakna a ṭhuanawp ṭhin - District & Sessions Judge

Lunglei Judicial District hnuaia district & session judge Vanlalenmawia kaihhruaiin nimin khan Chief Judicial Magistrate pisaah thubuai ngaihtuah lai jail tangte leh dan bawhchhiatna hrang hrang sawiho a ni. District & Sessions Judge chuan, eirûkna thubuaiah duh ang tâwk finfiahna a awm ṭhat loh ṭhin avangin dan anga hmalak ṭhuanawp ṭhin thu a sawi.

Vanlalenmawia chuan, khawvel changkannain a ken tel pakhat chu sualna pung zel hi a nih thu a sawi a, "Thil tisualtute an phû tâwka hremna pek a ṭul hle a, dan anga kal a ngaih avangin finfiahna (evidence) ṭha tak a awm tel a ngai thung, " a ti.

Evidence ṭha nei turin ukil leh prosecutor piah lamah, thuhretu (witness) ṭha an awm tel a ngaih thu sawiin Van­lalenmawia chuan, "Mipuite pawh a ṭul anga thuhretua ṭan ngam a pawimawh. A bik takin eirûkna thubuaiah duh ang tâwkin evidence a awm ṭha lo ṭhin a, hei hian dan anga hmalak a ti ṭhuanawp ṭhin. Dan kengkawhtute piah lamah mipuite pawhin tihtur an nei," a ti a, dan kengkawhtute ṭha taka lo puihbawm turin mipui a ngen.

Ṭhutkhawmah hian thubuai nei jail tang mekte chungchang bakah, dan kenkawh chungchanga hmalakna tur hrang hrangte sawiho a ni a; District & Sessions Judge hian Siahatlaa District Court building sak lai mek chu endikin, contractor leh PWD hotute'n an ṭawiawm.