Inthlan buaipuitute tan training buatsaih

August 27, 2020-a village council inthlan tura Kolasib district-a presi­ding officer leh polling officer-I te tan nimin khan Parish Hall, Kolasib-ah training buatsaih a ni a, bawrhsap Dr H Lalthlangliana'n a hawng.

Dr H Lalthlangliana chuan, Co­vid-19 lêng karah inthlanna buatsaih a nih dawn avangin inthlanna dan bua inziak lo thil tam tak zawm a ṭul dawn tih sawiin, "Vote thlak turte chu inkar hlata rem te, kut silna leh hand sanitizer chhawp vekte leh lehkha thlengin inkhawih ṭâwm lohte a ṭul dawn a ni," a ti a, inthlana chanvo neite chu phurrita ngai lo turin a chah.

Kolasib DC chuan, presiding officer leh polling officer-I te chu khawtlang hruaitu thlan chhuah kawnga mawhphurhna pawimawh tak la turin sorkarin a ring tâwk tih hrilhin, "Phûr takin mahni chanvo ṭheuh hlen turin ka chah che u a ni. Inthlanna hi a fair tur a ni," a ti. Kolasib district-ah hian VC 56-ah voter 60,634 an awm a, mipa 29,435 leh hmei­chhia 31,199 an ni. Hortoki khuaah voter tam berin 2,777 an awm a, Saihapui-V khua­ah voter 171 awmin, voter tlemna ber a ni.