Champhai MJA-in khawmpui an hmang

Champhai district Mizoram Journalist Association (MJA) chuan nimin khan Champhai Press Club-ah annual conference vawi 36-na an hmang a; Champhai North bialtu MLA Ginzalala, adviser to CM (technical)-in a hmanpui a; hmasawnna hna thawh kawngah ngaihpawimawh hmasak neih a ṭul thu a sawi.

Ginzalala chuan, Champhai district hmasawnna atan Champhai MJA-te nen thawhhona ṭha zawk neih a duh thu a sawi a, "Hmasawnna hna thawh kawngah ram changkang zawkte pawhin an tih ṭhin dan angin ngaihpawimawh hmasak neih a ṭul. Mimal tin hnenah hamṭhatna pek vek theih a ni lo tih hre rengin vantlang inṭawm theih hmasawnna tam zawk thlen thei tur rua-hmanna siam a ṭul," a ti.

Champhai District Hospital tih changtlunna tura sorkar hmasain hma a lo lak tawh chu ṭha taka an chhunzawm dawn thu sawiin Ginzalala chuan, "Doctor indaih lohna phuhru turin sorkarin ruahmanna a siam mek a, thingtlang mite harsatna chhâwk zangkhai turin primary health care tih changtlun a ṭul. Tourism hmasawnna atan Aizawl leh Champhai district-ah Swadesh Darshan 2.0 kalpui a ni dawn," a ti a, Champhai district-ah khualzin tam thei ang ber hruai lut turin mipuite pawh inpuahchah a ṭul dawn thu a sawi.

Champhai District MJA Annual Conference vawi 36-na ah hian DIPR staff-te kaihhruaiin kum 2024-26 chhunga District MJA hruaitu tur thlan a ni a; president atan Lalhlupuia, vice president atan C Lalhnunpuia leh treasurer atan C Lalrinsanga-te thlan an nih bakah, executive member mi panga thlan an ni.