KHAWTHLIR

State Election Commission chuan vawiin hian CYMA leh Mizoram People's Forum hruaitute chu VC leh LC inthlan lo awm tur chungchangah thu pawimawh sawiho turin a ko khawm. Hetihlai hian SEC aṭanga Vanglaini thudawn danin nimin tlai thleng kha chuan sorkar aṭangin inthlan sawn hla tura ngenna lam hawi SEC hian thu an la dawng lo.

Lawngtlai East bialtu MLA H Biakzauva chuan nimin khan Lawng­tlai district-a MUP-te recreation centre a hawng. 

State Election Commission-in August 26-a Mara Autonomous District Council-a Siaha North-I bialah MDC ni lai a thih avangin by-election a buatsaih turah, nimin kha hming pek luh tawp a ni a, mi pathumin hming an pe. Inthlan chuh turte chu B Zahra (BJP), N Alfred (INC) leh Nahlo Solo (MNF) te an ni a, Siaha College Venga cheng vek an ni.

Indian School Psychology Association (InSPA) leh School Education department chuan nimin khan 'Mental Health, Well-being and Life Skills' tih hmangin online workshop an buatsaih a, secondary school zirtirtute tan zirlaite'n rilru hrisel tak nei chunga nun an hman theihna atana an puih theih dan turte sawiho a ni.Online workshop-ah hian School Education director James Lalrinchhana leh InSPA & APSPA president Dr Panch Ramalingam-te pawh an tel a; mi 315 tel zingah India ram leh ram dang ram dang palia mithiamte an tel a ni.

State Referral Hospital (SRH) aṭangin nimin khan Covid-19 vei dam tawh mi panga chhuahtir an ni a, Covid-19 symptom nei lo leh enfiahna hrang hranga ṭha mi 17-te chu Covid Care Centre (CCC), ITI, Aizawlah sawn an ni bawk. SRH-ah hian hripui vei vangin mi 33 enkawl mek an ni a, ICU leh SICU-ah pahnih ve ve leh Isolation Ward-ah 29 an awm. SRH-ZMC Bulletin tarlan danin, ICU-a awm pakhat zawkin thâwk lamah harsatna a nei a, ngaihtuahawm erawh a ni lo.