Central kutah ZMC pek a ngai dawn lo; Sum vangin airport midang hlan kan duh - Chief Minister
Chief minister Lalduhoma chuan Zoram Medical College (ZMC) chu central sorkar kutah pek a ngaih dawn tâk loh thu leh sum dinhmun vanga Lengpui Airport midang hnena hlan duh an nih thu a sawi.
February 3, Inrinnia Kulikawn Hospital tihchangtlun dan tur an ennaah Chief Minister chuan, "ZMC central sorkar kuta pek kan han tihna chhan pawh hi kan sum dinhmunin a zir loh vang a ni. Central-ah pawh pe ila kan quota hi a bo dawn reng reng lo tih hi kan hriat a ṭha," a ti.
Lalduhoma chuan minister an neih ṭhat thu sawiin, "Ani hian central lam hotute dawrin a kal a, central lama sorkar hotute chuan in enkawl duh dawn a nih phawt chuan kan rawn dâwmkâng ang che u an lo tih hlauh avangin Central kutah pawh pêk a ngai dawn ta lo a ni," a ti a, minister mahnia insukaw thei an nei chu an lawm thu a sawi.
Health Minister chauh ni lo, minister dang pawh anmahnia central dawrin an insukaw mek zel tih sawiin Chief Minister chuan, "Ka chhuangin ka lawm em em a ni. Hetiang a nih avang hian Zoram thar a thleng ta chu kan la ti chiah ngam lo ang. Zoram thar hi a thleng ngeiin ka ring a ni," a ti.
Lalduhoma chuan Mizoramin airport a neihchhun chu ṭha se, changtlung se, chhuan tham ni se an duhthu sawiin, "Kan sum neihin a tlin ngang si lo a, chuvangin a enkawl theite hnena hlan hi kan duhdan a nih phah ta a ni. Sum tam tak sengin Kamrula-te'n an thawk," a ti a, an hna a chhiain estimate lo ang hlirin an thawh thu a sawi.
Chief Minister chuan tunah tak phei chuan Kamrul-a'n hna a thawk hleithei tawh lo tih sawiin, "Labour man ringawt pawh cheng vbc. 5 vel ba an nei a, chuvang chuan labour tur pawh an hmu mang tawh lo. A manganthlak em em a, pawisa an lo la hnemin an lo la deuh vek tawh si a, tih ngaihna a vang em em a ni," a ti.
ZPM sorkarah chuan quality ṭha lo an duh tawh lo tih sawiin Lalduhoma chuan, "CM office-ah endiktu dah an ni tawh a, hna reng reng a ṭha tur a ni a, a hun takah an zo ngei ngei bawk tur a ni. Hetiang hi mipui rawngbawlna mai a ni lo Pathian rawngbawlna a ni," a ti a, sorkar official-te pawhin thil ṭha an duhthu a sawi.