In sak phal lohna hmuna in sa AMC-in ṭhiat turin a hriattir

Aizawl Municipal Corporation (AMC) chuan in sak phal lohna hmun (protected area) atana an puan Bawngkawn - Durtlang road-a in sa Lalramsanga chu a in sak ṭhiat turin an hriattir.

AMC thuchhuah tarlan danin, municipal commissioner Lalhriatpuia chuan January 31 khan in ṭhiat tura hriattirna (demolition order) a ti chhuak a, Lalramsanga hi a in sak chu March 29, 2024 hma-a ṭhiat zo tur leh thupek a zawm loh chuan AMC-in a ṭhiah sak theih thu leh a ṭhiahna senso chu a chàwi a ngaih tur thu hriattir a ni.

July 12, 2023 khan Lalram­sanga hi protected area-a in a sak chhan sawifiahna hun pek a lo ni tawh a, a insawifiahna chu AMC chuan thu tlingah a pawm sak lo. A in ṭhiah a nih loh chhan tur sawifiah turin October 25, 2023 khan show cause notice pek a ni leh a, notice hi a chhang ta lo a ni.

Bawngkawn - Durtlang Road a Protected Area hi Aizawl Master Plan Vision - 2030 anga puan a ni. Aizawl khawpui hi chenna nuam taka siam tur leh in leh lote a him zawkna tura AMC hmalakna hi khauh taka kenkawh zel tum a ni. AMC chuan dan loa lei lai leh insa mek nia langte pawh endik zelin an chungthu ngaihtuah zel a tum a ni.

AMC chuan Aizawl khawpuia cheng mi tam zawkte'n AMC Building Regulation hi an ngai pawimawh viau tawh tih tarlangin, "Dan zawmah mipuite'n hma kan sawnin Buil­ding Regulation bawhchhiate pawhin AMC hmalakna hriattir an nihin an lo ngai pawimawh thiam sawt hle a, in ṭhiah ṭhen ngaite pawh an ṭhiat mai ṭhin," a ti.

AMC chuan dan zawm tum lo emaw, nachang la hre lo mi tlemte la awmte chu AMC Building Regulations hi Aizawl khawpui him zawk nan leh a lo nawm zawkna turin ngai pawimawh thar leh turin mi tin an ngen.