Group 'A' zingah MCS post ruak a tam

Mizoram sorkar hnuaia Group 'A' service hrang hrang 10 - MCS, MSS, MPS, MHS/Doctor, MES (PWD cadre), MES (IWR cadre), MES (PHED cadre), MES (PE cadre), MFAS leh MIS zingah Mizoram Civil Service (MCS) post 56.10% hnawh khah niin a tlem ber a; Mizoram Secretariat Service (MSS) post hnawh kha tam berin 99.38% a ni.

Thudawn danin, Mizoram sorkar hnuaiah MCS post 82 siam a ni a, February 2, 2024-a MCS combined exam result nen chhiar telin post 46 hnawhkhah niin post ruak 36 a awm. MCS post hnawh khah hi 56.10% a ni a, indaih lohna avangin officer pakhatin post pahnih/pathum an chelhkawp.

Group 'A' Service zingah MSS-te'n sanctioned post 161 neiin, post ruak pakhat chiah an nei a; MSS post hnawh khah hi 160 (99.38%) a ni. Mizoram Health Sevices (MHS)/doctor tan sorkarin post 469 a siam a, post 365 (77.83%) hnawh khah niin, post ruak 104 a awm bawk.