KHAWTHLIR

Thisen pe

Ramhlun Branch KṬP te chuan Inrinni khan Synod Hospital blood bank tan thisen unit 41 an pe a, a petute chu mipa 35 leh hmeichhia paruk an ni. Inrinni vek khan Chanmari West Branch YMA chuan an dincham vawi 34-na pualin Zoram Medical College tan thisen unit 32 an pe a, thisen hi mipa 24 leh hmeichhia pariatin an pe.

Heroin man

Excise & Naroctics dept. chuan February 2, 2024 tlai khan Tuidam khuaah heroin gram 763 leh a neitua puh Abdul Mazid (24) s/o Abdul Odu leh Majibur Rahman (24) s/o Rajab Ali, Cachar district, Assam ve ve nia inchhalte an man. Heroin phurhna atana an lirthei hman pawh hren sak nghal an ni.

Career Mela

Siaha district Samagra Shiksha leh Siaha District Officers Clubs ṭangkawp chuan February 2, 2024 khan MADC Forest Hall-ah high school leh higher secondary school-a hmeichhe zirlaite pualin Career Mela 2023-2024 an buatsaih a; MADC vety officer Dr HC Joane Mary leh District Labour & Employment officer Reuben T Kompa-te'n zirlai hmeichhiate chu an hma lam huna hnathawh tur leh eizawnna kawng hrang hranga hma an lak dan turte an zirtir.

Mau project

Horticulture minister Prof. Lalnilawma hoin February 2, 2024 khan a pisaah Horticulture department hotute'n Asian Development Bank bultuma India hmarchhak state a maute a hlawk thei ang bera hman ṭangkai dan tur ruahmanna 'Bamboo value chain in North East region project' chungchang an sawiho. Minister chuan, he project hmang hian Mizorama mau awmsa hman ṭangkai leh sawngbawl bakah, ram tana chhenfakawm zawka kalpui a nih a beisei thu a sawi.

EFCI khawmpui

Kum tin February chawlhni hmasa ber huama neih ṭhin angin Evangelical Fellowship Church of India (EFCI) kohhrana Presbytery 17-te chuan February 2-4, 2024 chhung khan bial pum huapin hmarchhak state hrang hrangah Presbytery Inkhawmpui tluang takin an hmang. He inkhawmpuiah hian Rorelna hun bakah kum 2024-2026 chhung atana Presbytery puipa turte an thlang.