Neutral an tam poh leh ramin a ṭhatpui dawn - Lalduhoma

Aizawl North-I Block ZPM chuan February 3, Inrinni khan Vety Rest House, Selesihah ZPM sorkar lawmna leh an bialtu MLA Vanlalhlana chawimawina hun an buatsaih a, an hun hmanpuitu ZPM leader Lalduhoma, chief minister chuan neutral an tam poh leh ramin a ṭhatpui tur thu a sawi.

Lalduhoma chuan an chakna chu party mal chakna ni loin, mipui chakna a nih thu sawiin, "Kan campaign lai khan kan party worker-te an thawkrim ber tih hi kan pawm tlâng. Ram mipui nawlpuite'n ram roreltu an thlang a, neutral-te hi an pawimawh em em a, neutral kan tam poh leh kan ram hian a ṭhatpui dawn a ni," a ti.

A bul an ṭan chho chauh tih sawiin Chief Minister chuan, "Mipui mimirah leh sorkar hnathawkah a ṭha lam duhna a lo lian zel a, a lawmawm em em a ni. A ṭha zawngin kan rilru a insiam zel a, Zoram thar kan hnaih zel niin kan hria," a ti a, a siamṭhatu ni zel turin Mizoram mipuite a chah.

Lalduhoma chuan an sorkar hma ai khan an sorkar hnu hian mipuiin an lakah beiseina an nei sang zel nia an hriat thu sawiin, "Inthlan hmaa kan thusawite thu-a chantirtu tur kan ni a, kan taimak leh zual a ngai a ni. Ni 100 chhunga tih tur kan ruahmante pawh kan tihlawhtling chho zel," a ti.

Chief Minister chuan mipuite a bikin ṭhlaite mahni kea ding thei leh chhungkaw intodelh a tam thei ang ber siam an tum tih sawiin, "Tupawh lo sorkar se mahnia intodelha dingchhuak thei tura siam hi kan tum a ni," a ti a, taimakna leh rinawmna hmanga hausak chu a tlo ber a, Pathian duh dan pawh a nih thu a sawi.

Thusawitu dang Aizawl North-I bialtu MLA Vanlalhlana, minister chuan, "Kan campaign laiin hlim takin kan campaign a, kan thawhrim rah kan seng ta a, kan zavaia kan thawhrim rah a ni. Kan bial chhungah polling station zawng zawngah hnehna kan chang a, a lawmawm em em a, he hnehna hi kan zavaia ta a ni," a ti.

Vanlalhlana chuan MLA-te chu mipui aiawha ding mai an nih thu sawiin, "A hlawhtlinna erawh chu mipui ta a ni. Ram tan ke kan pen ho zel ang a, mipuiin min beiseina a sang hle a, tih tur hmachhawp pawh kan ngah em em a ni. Famkim lo mihring ve tho kan ni," a ti a, ṭawngṭainaa hre reng turin an party mite a chah.