Serchhip DC-in damdawi-in a tlawh

Serchhip DC Kumar Abhi­shek chuan nimin khan Ser­chhip District Hospital a tlawh a, thawktute nen damdawi-in tihhmasawn dan tur an sawiho.

Kumar Abhishek chuan, damdawi-in building chu a thar saka tihlen ṭul hle tawha a hriat thu sawiin, "Department-in hma a lâk tawhna chinte zir chianga chak taka bawhzui a ṭha," a ti a; Covid-19 enna kháwl TrueNAT-PCR bunna tur hmunhma buatsaih mek tlawhin, thawktute chu chak taka thawk turin a hrilh.

Serchhip District Hospital medical superintendent Dr ZD Lalmuanawma chuan, swab sample endikna khawl Truenat Micro PCR chuan Serchhip a thleng tawh a, a viltu turte pawh training neihtir an nih tawh thu a sawi a, "Tunah hian khawl dahna tur pindan siam mek a ni a, harsatna dang­in a tlakbuak loh chuan hman ṭan thuai beisei a ni," a ti.

Damdawi-ina thawktute chuan, nurse an indaih loh thu an DC hnenah an lo thlen. An sawi danin, nurse awm zawng zawngte chawlh la awm loa an thawh kim ṭhap pawhin, zanah ward zawng zawng vil turin nurse pathum chauh an awm thei a; chawhma lamah panga, chawhnu lamah pali chauh an duty thei a ni.