Lunglei district khawthlang lam leh NHIDCL-a thawkte'n sikserh an vei nasa

Lunglei District Task Force Committee for Elimination of Malaria chu an chairman Ramdinliani, bawrhsap kaihhruaiin February 2, 2024 khan an ṭhukhawm a; kum 2023 chhungin Lunglei district-ah sikserh (malaria) hrik pai mi 4,959 hmuh chhuah niin, malaria hrik pai zingah Lunglei district khawthlang lam mi leh NHIDCL hnuaia kawngsial hna thawktute an tam.

Ṭhutkhawma tarlan danin, Lunglei District Vector Borne Disease Control Programme team chuan thingtlang khaw 193 an tuam a, kum 2023 chhung khan Lunglei district-ah mi 51,058 thisen endik aṭangin malaria hrik pai mi 4,959 (kum 2022-ah 2,890) hmuh chhuah an ni a; he'ng zinga 3,673 chu malaria Pf leh 1,286 malaria Pv an ni. Kum 2023 chhung hian malaria vangin Lunglei district-ah mi pathum an thi.

Kum 2023-a Lunglei district-a malaria hrik pai hmuh chhuah zingah Lunglei district khawthlang lam mi leh NHIDCL hnuaia NH-54 leh NH-302 kawng sial hna thawktu labour-te an tam a; chikungunya vei mi 43 leh dengue vei mi 179 hmuh chhuah an ni bawk.

Lunglei district-ah hian fur laia lirthei thlen theih lohna, lawng (boat) chauha kalpawh theih thingtlang khua 30 vel a awm a; Bawrhsap hmalaknain Disaster Management & Rehabilitation dept. hnuai aṭangin mi 12 chuàn theihna lawng siamtir mek a ni.