Adviser to CM-in dept. hotute a kawm

Champhai North bialtu MLA H Ginzalala, Adviser to CM ni bawk chuan February 2, 2024 khan Circuit House-ah Champhaia sorkar department hrang hrang hotute a kawm a; "Hmasawnna kawng kan zawh chu khawtlang tan a ṭha tur a ni a, ram economy leh environment tan a ṭha ngei ngei tur a ni," a ti.

H Ginzalala chuan, Champhai district-in hma a sawn theihna turin official-te chu an theihna kawngah ṭheuh thurawn pe tur leh an ṭhahnem ngaihnate awmze nei zawka an kalpui theihna tura finchhuah ṭhin turin a ngen a, "Champhai district-in hmasawnna kawng kan zawh chu khawtlang tan a ṭha tur a ni a, ram economy leh environment tan a ṭha ngei ngei tur a ni. Hengte tel loa hmasawnna kawng kan zawh chuan a hlawhtling tak tak thei lo," a ti

Sorkar hnathawkte'n thil tum inang nei mahse kalpui dan a darh ṭhin avangin hmasawnna a kal chak mawh tih sawiin Ginzalala chuan, "Ramin awmze nei zawka hma a sawn theihna turin thawhhona ṭha zawk kan mamawh, " a ti a; department hrang hrangte'n an remhriatna an thawhkhawm thiam a pawimawh thu a sawi.

He hun hi additional DC M Misael-a'n a kaihruai a, sorkar department hrang hranga head of office-te'n zawhna leh sawi duh an neihte MLA hian a ngaihthlak sak a ni.