Zirlaibu quality ṭha siam a ṭul - P&S Minister

Printing & Stationery minister F Rodingliana chuan February 2, 2024 khan Guwahati-ah Mizoram sikul naupang zirlaibu chhutna hmunte a tlawh kual a; zirlaibu quality ṭha siam a ṭul thu leh a hun taka zirlaibute zirlaite hnena sem a pawimawh thu a sawi.

Assam media mite nen an inkawmnaah P&S Minister chuan, Guwahati a tlawh chhante leh Mizoram sorkar hmachhawpte a hrilh a; sikul naupang zirlaibu chhut mek chu ngaih pawimawh ngai bik a nih thu sawiin, "Zirlaibu quality ṭha siam a ṭul a, a hun taka zirlaibute zirlaite hnenah sem chhuah a nih theih nan a hmun ngeiah ka rawn enfiah a ni," a ti.

F Rodingliana hi Printing & Stationery deputy controller Josephine Zonunsangi, principal cum project manager Vanlalmuanchhana leh Guwahati Mizoram House deputy resident commissioner Dr Malsawmtluanga Fanchun-te'n an ṭawiawm a ni.