AR laka action la turin sorkar ngen

Vairengte Joint YMA chuan thuchhuah siamin, August 18, Thawh­lehni tlaia Assam Rifles mi 15 velte'n Vairengtea medical duty leh police duty-te pawisakna nei lo leh swab test ti duh loa an tlân tlang luih avangin an lungawi loh tak zet tih an tarlang a; an chunga action la turin sorkar an ngen.

Covid-19 hripui vangin ram leh khawtlang an buai hle tih sawiin Vairengte Joint YMA chuan, "Keini Mizoram daido bera awm, Vairengte khua pawh sorkar leh NGO-te thleng pawhin hripui laka kan him theih nan mutmawh hnàrmawha neiin kan phak tâwkin kawng hrang hrangin ṭan kan la ve a ni," an ti a; khualzin leh driver zawng zawngte chu Vairengtea Rapid Antigen Test (RAT) paltlang lo chuan Mizorama luh phal a ni lo tih an sawi.

Assam Rifles-te chêt dan chung­changah Vairengte Joint YMA chuan, "Hripui inkai darh awlsam tak laka mipui kan himna tura sorkar hmalakna engah maha ngai lo a, tiderthâwng zawnga khaw­sate chungah hian na taka action la turin kan sorkar kan ngen tak meuh a ni," an ti.

Kolasib Sub. Hqrs. YMA pawhin thuchhuah siamin, AR-te chuan sorkar leh Mizoram mipuite min zah lo tih a chian thusawiin, "Hetia containment zone zah lotu AR-te chungah hian zilhauna leh hremna pek a nih ngei theih nana hma la turin Mizoram sorkar kan ngenin, kan phut tlat," an ti.