MNF leh Congress thawh dunna VC sawi turin Duhoma an phût
MNF party chuan thuchhuah siamin, August 27, 2020-a VC inthlan turah ZPM Legislature Party (ZLP) leader Lalduhoma'n MNF leh Congress party thawh dunna a hriat chuan, an thawh dunna hmun sawi chiang turin an phût tih an tarlang.
MNF thuchhuah chuan, ZPM MLA Lalduhoma'n tun hnaia thuthar thehdarhtute a kawmnaah, VC inthlan awm turah MNF chu Congress nen khaw pahnihah an thawk dun niin a sawi tih a tarlang a, "MNF chuan kan theih chin chinah kan inzawt kim thawkhat viau a, chuti chung pawhin VC inthlan turah hian Congress nena kan thawhhona âwm khua leh veng kan hre lo. Pu Duhawma hian min hrilh theih chuan kan lawm hle ang," a ti.
MNF party chuan, VC inthlan awm turah hian ZPM-in MP inthlana an thawhpui tawh Congress party chu khaw 35-ah an thawhpui leh a, khaw pahnihah BJP an thawhpui bawk niin an tarlang a; "Party dang thawhpui tawh lo tura intiam fo ZPM-in Congress leh BJP an thawhhopui hian mipui mak tih leh dem a hlawh hle a ni," an ti a, chuvang chuan Lalduhoma'n MNF chu Congress thawhpuiah a puh ta mai nia an ngaih thu an sawi bawk.