Kângmei Vèn Hapta hman ṭan a ni : Chhuan awm zel turte tana chenna tlakah Kan ram hi kan siam ngei tur a ni - CM

Chief minister Lalduhoma chuan nimin khan Synod Conference Hall-ah 'Kângmei Vèn Hapta, 2024' a hawng a; "Kan ram hi vawiin leh naktuka chhuan lo la awm zel turte tan chênna tlâk ram ṭhaah kan siam ngei tur a ni," a ti.

Lalduhoma chuan kângmei laka ramngaw venhim kawngah ṭan lak a ṭul thu a sawi a, "Kan pi leh pute khan ram kâng pawizia an hriat avangin lo leh huan an hâl dawnin ṭha takin meilam an sial a, meilu khaiin an hâl chauh ṭhin," a ti a, vanduai thila kângmei a chhuah palh pawhin a pachhuakin ṭhelh turin an bei vata, rang takin an ṭhelh leh ṭhin thu a sawi.

Ṭhangthar fing zawka ngaihte hian ram an tikang nasa hle tih sawiin Lalduhoma chuan, "Kan eizawnna atana loh theih loha lo kan hâl hi chu thuhran a ni a, kan fimkhur loh avanga kan ti kâng ṭhin hi en liam a har," a ti.

Ngaihtuahna thar pu tura mitin chahin Chief Minister chuan, "Kangmei laka kan ram venghim tura thapui thawh thar turin mipuite ka sawm a ni. Kumina kan thupui pawhin chu chu a tum a ni," a ti a, fimkhur loh vang te, suahsual vanga ram tikangte phei chu an chungah dan anga hma la ngei turin hmun tina dan lekkawhtute a hriattir.

State Level Committee on Fire Prevention te, District Level Committee leh Village Level Committee te, tlawmngaipawl leh ramkang venhimna lama mi ṭhahnemngai zawng zawngte chu hapta chhungin hmalakna ṭha tak nei tur leh hapta zawh hnuah pawh bawhzui zel turin Chief Minister chuan a chah bawk.

Environment Forest & Climate Change minister Lalthansanga pawhin thu a sawi a; PCCF Ashok Kumar Biswal chuan hapta hman chhan leh hmalak dan tlangpui a sawifiah. CF (P) Laltlanhlua Zathang kaihhruaiin kalkhawmte'n Fire Prevention Week thutiam an sawirual a ni.

Kângmei Vèn Hapta (Fire Prevention Week) hi February 5-9, 2024 chhung kalpui tur a ni a, thupui chu 'Thapui thawhin kangmei chhuak tur i veng ang u' tih a ni. Fire Prevention Week hi Mizoramah kum 2000 aṭang khan hman ṭan niin, kumin hi a ṭum 25-na a ni a; kum 2009 aṭang khan district leh village level fire prevention award sem ṭan a ni.

India ram pumah Mizoram hi ram zau zawnga tehin thing leh mau awmna (forest area) nei zau ber niin, ISFR 2021 record-a a lan danin 84.53% chu forest in a tuam a, hetihrual hian ram ngaw chhah ṭha (Very Dense Forest area)-ah erawh 0.74% chauh niin, India hmarchhaka ramngaw chhah ṭha nei tlem ber a ni.

ISFR report hnuhnung berah chuan kum 2020 aiin kum 2021-ah forest area zau zawng hi 0.88% in a tlahniam.