ZPM aia ṭhain kan ti dawn - MPCC President

Mizoram Pradesh Congress Committee (MPCC) hnuaia Aizawl khawpui chhunga hruaitute chu nimin khan Lal Thanhawla Auditorium-ah an inhmu­khawm a, thusawitu MPCC president Lalsawta chuan ZPM aia ṭha-a an tih dawn thu a sawi.

Lalsawta chuan, hmalam an thlir a ngaih thu sawiin, "Hun hlui a liam tawh a, huntharah kan chuang a, hunthar hian mi rilruah pawh thil thar an beisei a ni. Rilru thar nen he hun tharah hian kan pen a ngai a, chu rilru chu i pu ang u. Kan ram tana kan sawi chak leh kan enghelhte hi a thar a ngai a ni. ZPM hian an tiṭha viau thei a, an intihṭhatpoh leh an aia ṭha tura kan awm a ngai. ZPM-in mipui tana thil ṭha an tih theih chuan a lawmawm, an aia ṭhain kan ti dawn," a ti.

Inthlanpuiah an chak lo chu pawi a tih thu sawiin MPCC President chuan, "President ka nihna angin mawhphurtu ka ni. Mipuiin nghah an nei a, enchhin phawt loh chuan khawdang hawi an tum lo tlat," a ti a, kum lamah a upat tawh avangin an party a hruai zel chuan a chakpui lo ang tih a hlauh thu a sawi.

MPCC President chuan Aizawl khawpui chhunga an party hruaitute'n thâ thlah hauh loa an la dinchhuah leh ngei tur thu sawiin, "National party hi kan awm reng ang, nghet takin Congress ula, kan la sorkar em em ang. Rang taka kan Party hruai ding leh thei tur hruaitu, kan hma lawka party inthlan kan neih turah hian kan thlan a ngai," a ti.

Hruaitu kalkhawmte chuan eng ang hruaitu nge an party-in an neih dawn tih thu-ah an pawimawh thu sawiin Lalsawta chuan, duhthlanna fim tak hmang a, an party hmasawn zelna tura hruaitu ṭha ber tur nia an ngaih ngei thlang turin a ngen.