ZPM sorkar hi an thawh ṭhat loh chuan kan dim dawn lo - MNF Vice President

MNF chuan nimin khan an pisa-ah chhung inkhawm an hmang a, thusawitu MNF vice president Lalthlengliana chuan, ZPM sorkarin an thawh ṭhat loh chuan an dim dawn loh thu a sawi.

MNF Vice President chuan, sorkar tharin ram tana hna thawk tak tak chunga ro an rel a nih chuan ṭha a tih thu sawiin, "Sorkar hmasain thil ṭha an tih chu chhunzawm zel se ka duh a ni. Tuna sorkar hi mipui hmaa an intiamna angin an thawk zel em tih kan thlir reng dawn a, an thawk ṭha lo a nih chuan kan dim dawn reng reng lo," a ti.

Chak leh inringin inthlan an beih thu sawiin Lalthlengliana chuan, "Kan tla ta si. Kumkhuain a tlin reng theih tlat loh a ni. Amaherawhchu, roreltute hi Pathian ruat an ni tih pawm ila, tuna roreltute pawh hi a ruatte an ni. Min enchhin rawh u tia intiam an ni," a ti a, engtin nge an kal zel an thlir dawn thu a sawi.

MNF chuan inthlan an hmachhawn tam tawh thu sawiin, "Tlak chang a nei angin tlin chang pawh a awm ṭhin. Tunah eptu lamah ṭhu mah ila nakinah kan thochhuak leh dawn. Taima taka beituten a tawpah thawhrim rah an seng ṭhin," a ti a, taima taka ‘Pathian leh kan ram Tan’ tia bei zel turin MNF Vice President chuan an party mite a chah a ni.