Power-a kan intodelh theihna atan hma kan la chho mek - P&E Minister

ZPM chuan nimin khan an pisa-ah chhung inkhawm an hmang a, thusawitu ZPM consultant F Rodingliana, Power & Electricity minister chuan power-a intodelh turin hma an lak mek thu a sawi.

F Rodingliana chuan power-ah Mizoram a intodelh theih nan sorkar laipui mai an dawr lo tih sawiin, "Foreign thlenga dawrin hma kan la mek. Policy mila budget kan siam aṭangin hmasawnna bung thar kan kai dawn a, kum nga chhungin power-ah intodelh kan tum dawn," a ti.

Power-a intodelh theih nan hydel project bakah ni zung chakna hman ṭangkai lehzual an tum dawn tih sawiin P&E Minister chuan, "Rooftop leh solar plant liante siam tura hmalak mek a ni," a ti a, power khawlna tur power store bank siam tura hmalak mek a nih thu a sawi.

P&E Minister chuan nizung chakna bakah hydrogen leh ethanol hmanga power plant siam tura kawng dap mek a nih thu sawiin, "Mizoram khaw hrang hrangten solar plant kan siamna turin ram min pe a, mahse duhkhawp a la nih loh avangin kan intodelh theihna tura hetiang hmun pe thei khua kan awm chuan a lawmawm hle ang," a ti.

Company leh ram hrang hrangte dawrin thil kalphung ṭha zawk an zir zel tih sawiin F Rodingliana chuan, "Hma kan lak mek laiin ṭhenkhat chuan kum 10/20 chhunga an tih theih loh thla 2/1 chhunga ti mai turin min beiseina ṭawngkam ni âwm takte kan hre ṭhin," a ti a, ZPM sorkar chu enge a nih an la hriat tur thu a sawi.

Commerce & Indus­tries minister F Ro­ding­liana chuan industry atan ram ṭha tak tak Mizoramin a neih thu sawiin, "Kan han vakkual a, ziakah chuan a khat vek. A hmunah chuan a thawl a, ram ruak a zau hle. A ram neitute chu in hre hlawm ang, engmah hma an la hlawm lo," a ti.
F Rodingliana sawi danin, industry ram tur, hma la chuang si loin an ta neih ho chu a hmang ṭangkai tur tak takte'n an hman theihna atan dan hnuaiah hmalak a ni dawn.