District tinah Kângmei Vèn Hapta 2024 hawn a ni
Kângmei Vèn Hapta 2024 chu nimin khan district hrang hrangah hawn a ni a; thupui chu 'Thapui thawhin kangmei chhuak tur i veng ang u' tih a ni.
Kângmei Vèn Hapta (Fire Prevention Week) hi Mizoramah kum 2000 aṭang khan hman ṭan niin, kumin hi a ṭum 25-na a ni a; kum 2009 aṭang khan district leh village level fire prevention award sem ṭhin a ni.
LUNGLEI
Lunglei High Powered Committee vice chairman V Malsawmtluanga chuan Lunglei Convention Hall-ah Kângmei Vèn Hapta hawngin, "ZPM sorkar chuan thil a nih tur ang taka nih tir leh kalpui hi a tum tlat a ni," a ti.
V Malsawmtluanga chuan, kangmei chhuak chu mihring tihchhuah deuh vek a nih thu a sawi a, "Mi tin i fimkhur tlâng ang u. Tupawh India khua leh tui tawh phawt chuan khuanu kutchhuak ramngaw te, lui te, dil te leh nungchate humhalh hi kan tih ngei ngei tura India Constitution-in min phut tlat a ni. ZPM sorkar chuan thil a nih tur ang taka nih tir leh kalpui hi a tum tlat a, dan kenkawh kawngah pawh kan khauh dawn a, a ṭulna a piangah action kan la ngam dawn a ni," a ti.
Forest Survey of India tarlan danin, Lunglei district-ah hian kum 2023 khan hmun 212-ah kângmei a chhuak a, ram hectare 44.87 a zau a kâng. Kângmei chhuak zinga ram hectare 27.29 chu ramngaw kaâng a ni.
CHAMPHAI
Champhaiah chuan Kângmei vèn hapta hi Champhai Zotlanga DIET Campus-ah additional DC M Misael-in a hawng.
M Misael chuan, kângmei hi fimkhur tâwk loh leh inthlahdah vanga chhuak a awm fo tih a sawi a, "Kângmei vang hian thing leh mau, nungchate a chereuh nasa a, boruak nasa takin a bawlhhlawh bakah kan ni tin mamawh tuihnate a kiam zel. Ramngaw siam hi thil hautak tak, hun leh thâ, sum leh pai tam tak senralna a nih ṭhin avangin thing leh mau kan neihsate hi duat taka enkawl a ngai," a ti.
Champhai Sub-Hqrs. MUP president K Lalrintluanga kaihhruaiin kalkhawmte'n ram tikang lo tur leh ramngaw leh nungchate humhalh turin thutiam an sawirual a ni.
KOLASIB
Kolasib-ah chuan Kângmei vèn hapta hi Kolasib District Level Fire Prevention Committee leh Kolasib College-a National Service Scheme (NSS)-te ṭangkawp huaihawtin St. Joseph's Parish Hall-ah hman a ni a; Assembly deputy speaker Lalfamkima, Kolasib bialtu MLA-in a hmanpui.
Lalfamkima chuan, tunhma ngaihtuahin tunlaiah kangmei a chhuak nasa tawh tih sawiin, "Mizote chu pi leh pu hun lai aṭanga tlang ram lo nei mi, kum tina lo hal ṭhin kan ni a, mahse, kan pi leh pute khan kangmei tihchhuah an hlau em em a, uluk taka mei kawng sialin, kangmei tichhuak lo turin an fimkhur ṭhin. Tunlai hunah kangmei kan tichhuak nasa ta lutuk hi a veiawm hle," a ti a, ram nuam zawk siam tura ramngaw leh nungcha humhalh kawnga thâ thawh turin mipui a sawm.
Kum 2021-2022 chhung khan Kolasib district-ah ram hectare 112.50-a zau a kang a; kum 2022-2023 ah hectare 102.26 leh kum 2023-2024 ah hectare 87.02-a zau kangin, ramkâng hi kum thum chhungin a tla hniam zawngin a kal tih tarlan a ni.
SERCHHIP
Serchhip SP MS Dawngkima chuan Serchhip DC conference hall-ah Kângmei vèn hapta 2024 a hawng a; Serchhip MJA president C Lalhminghlua kaihhruaiin kalkhawmte'n kângmei veng tura thutiam an sawirual a ni.
MS Dawngkima chuan, Mizoram hmun hrang hrang dinhmun thlirin kângmei vèn kawngah ṭan lâk nasat a ngaih thu a sawi a, "Kângmei hi chi hnih - ramkâng (forest fire) leh in kâng (domestic fire)-a ṭhen a ni a, ngaih pawimawh ve ve a ṭul. Kângmei ti chhuak lo turin kan zavaiin kan fimkhur tur a ni," a ti.
LAWNGTLAI
Lawnglaiah chuan Lai Autonomous District Council chief executive member V Zirsanga hoin DC Conference Hall-ah Kângmei Vèn Hapta hman a ni.
V Zirsanga chuan, tun hma chuan ram kâng vèn kawngah Lawngtlai district chu Mizoram pum a tiṭha thlan chhuah zingah a tel ṭhin thu a sawi a, "Kum 2019 hnu lam hian kan lang chhunzawm ta lo a, lawmman beisei vang ni loin ram leilung hausakna venhim leh humhalh chu kan zavai mawhphurhna a ni tih kan hriat thar a ṭul," a ti a, ṭanla turin district mipui a chah.
Hapta hawnna inkhawmah hian Lawngtlai district-a sorkar pisa hrang hranga thawktute leh tlawmngai pawl hruaitute an tel a; ram leilung hausakna humhalh kawnga thawktu ni turin thutiam an chhamrual a ni.
MAMIT
Mamit District Level Fire Prevention Committee huaihawtin Mamit Chhimveng YMA Hall-ah Kângmei Vèn Hapta hawn a ni a, Mamit SP Lalthangpuii Pulamte chu khuallian a ni.
Lalthangpuii Pulamte chuan, "Khua a lo ṭhal chho leh ta a, kan fimkhur tawk loh vangte, lo/leipui hâl vangte, dan leh thupek zawm loh vangte in ram kan ti kâng ṭhin a, a pawi hle. Ram kâng hian nghawng ṭha lo tak tak a nei ṭhin a, mihring hriselna thlenga nghawng pawi thei a nih avangin sorkar pawhin ram kâng vên hi a ngaipawimawh a ni," a ti.
Mamit district Wildlife warden K Lalmuankima kaihhruaiin kalkhawmte'n ram ti kang lo tura intiamna an sawirual a ni.
SAITUAL
Saitualah chuan nimin zing dar 7 khan Bawrhsap Bangla tualah hman a ni a, additional DC Lallawmawma'n a hawng .
Lallawmawma chuan, "Kângmei Vèn Hapta thupui bawhzui turin mi tinte'n thapui thawha hmalak a ṭul. Vilage Level Committee on Fire Prevention-te'n khaw hrang hrangah a hma lamin lo hal ní te intuk ni se, hmun hma hla deuhte leh enpui ngaite in enpui ni se, khaw dinhmun a inanglo ang hian insawr bing ṭul bikna deuh khuate ngaihtuah tlan ni se," a ti.
He hunah hian Saituala sorkar department aiawh te, khawtlang leh NGO hruaitute an tel a, kangmei veng turin thutiam an sawirual.
HNAHTHIAL
Hnahthial District Level Committee on Fire Prevention chuan Hnahthial College Auditorium-ah Kângmei Vèn Hapta hawnna an buatsaih a; additional DC Lalvenhima'n a hmanpui.
Lalvenhima chuan, kângmei vèn kawngah mei kawng sial leh lo hal hun ngaih pawimawh a ṭul thu a sawi a, "Mihringte tan nungcha, thing leh mau a pawimawh hle a, boruak thianghlim leh tui hnianghnar tak nei tur chuan thingphun uar a ngai a, nasa lehzuala awareness neih a pawimawh hle a ni," a ti. zirlai kalkhawmte chu nungcha pawimawhna hre pha chin an nih avangin an thiamnate hmang ṭangkai turin a sawm.
KHAWZAWL
Khawzawlah chuan additional DC Lalfakzuala'n Khawzawl Electric Veng YMA Hall-ah Kângmei vèn hapta a hawng a; sorkar hotute leh khawtlang hruaitute an tel.
Lalfakzuala chuan, Khawzawl chu district lian tak ni lo mahse kut hnathawk uar district an nih angin kângmei laka invenna hapta neih chu a ṭul thu a sawi a, "March 15, 2024 hma ngeiin lo hal vek tur a ni a, ṭheh loh ram vâtte'n February thla ral hma ngeiin lo hâl vek tur a ni. Kângmei vènna kawnga thawk ṭha khua pathum hnenah chawimawina pek a ni ang," a ti.