Inthlana mipui himna tur ngaihtuah

Nimin khan Champhai DC Maria CT Zuali hoin official, Mizoram People Forum (MPF) leh YMA hruaitute'n DC conference hall-ah August 27-a village council inthlan nia mipuite Covid-19 laka him chunga vote an thlak dan tur an ngaihtuah.

Maria CT Zuali chuan VC inthlan buaipuitu State Election Commission duhdanin Covid-19 hrileng laka inkaihhruai­nate zawm chung zelin mumal leh awmze nei taka vote thlak anih theihna turin ruahmanna siam tum anih thu sawiin, "Covid-19 avangin inthlan tawh dan kal­phung hmasate zawm a rem tawh lo. Inthlanna muanawm leh felfai tak neih anih theihna kawnga tangkai tak MPF-te nena ṭangkawpa hmalak leh a ngai dawn," a ti.

Official level aṭangin mipuite himna tura mamawhte chhawpchhuah tum a nih thu sawiin Champhai DC chuan, "MPF leh NGO hruaitute pawh mipuite zirtir leh hrilhhriat kawngah theihtawp chhuah turin ka sawm a ni," a ti a, MPF leh NGO hruaitute chuan inthlan campaign nana social media kaltlanga inbeihna leh inchirhthehna awm theiahte beng chhi reng tur leh hmalak zelna kawngah thuneitute ṭawiawma puibawm tlat thin turin a ngen.

MPF leh YMA hruaitute chuan inthlanna muanawm leh felfai neih anih theihna tur kawnga mipuite zirtir leh vote thlak nia ruahmanna siam zawm kawnga zirtirnaahte inthlan buaipuitute ṭawiawm tlat an tum thu an sawi.

    Inthlan hmain vote neite hnenah voter’s Slip, VC roll-a an serial number indawt ang zel leh vote thlak hun tur darkar bituk tarlanna sem lawk vek . Voter’s slip chu MPF kaihhruaina hnuaiah semchhuaha inhrilhhriatna neih nghal zel

    Vote thlak turte an vote thlak hun tura bituk zelah vote thlak tura beisei

    Veng chhung information centre leh Whatsapp kaltlangin inhrilhhriatna neih zel

    Vote thlakna hmunah vote thlaktu hming leh biakpawh theihna phone number register a ziah luh zel

    Vote thlak ni a mipuite zawm tur leh an himna tura ruhmanna district puma khairual taka hman theih tur duan