Mau/rua hmanga kutthemthiam thil zirna ṭan

Indian Council of Forestry Research and Education - Bamboo and Rattan Centre (ICFRE-BRC), Bethlehem Vengthlang chuan nimin khan Van Vigyan Kendra, Mizoram hnuaiah mau/rua hmanga kutthemthiam thil zirna, 'Bamboo and Rattan Handicrafts Skill Development Training' an buatsaih a, bialtu corporator R Lalawmpuii'n a hmanpui.

R Lalawmpuii chuan, hlawhtlinga hmasawn tur chuan tunlai khawvel mil zela thiamnate tihpun a pawimawh thu a sawi a, "Taima leh zuala ṭan lâk a ngai ṭhin. He training aṭanga hlawkna leh thiamna chhar ngei thei turin tih tak takna nen zir ang che u," a ti.

ICFRE-Rain Forest Research Institute, Jorhat, Assam director Dr Nitin Kulkarni pawhin thu sawiin, mau leh rua hmanga sumdawnna din turin India hmarchhak ramte hian theihna nasa tak a neih thu a sawi.

Training hi February 5-7, 2024 chhung neih tur a ni a; Bethlehem Vengthlang leh Armed Veng South local council huamchhung aṭangin training turin mi 20 thlanchhuah an ni a, mau leh hnang aṭanga thil siam dan an zir dawn a ni.