Jeje-a'n office hotute a kawm

South Tuipui bialtu MLA Jeje Lalpekhlua chuan nimin khan Hnahthial DC conference hall-ah Hnahthial district chhunga head of office (HoO)-te a kawm.

Jeje Lalpekhlua chuan Pathian leh mipuite zarah sorkarna vawnfung chelhin an awmve ta tih sawiin, "He sorkar hian ramin hma a sawn theihna turin hmachhawp tam tak a nei. Kan Chief Minister chuan ni 100 chhunga tih tur a duang chhuak a, hei hi chu kan hre vek tawh turah ka ngai. Ka ngaih pawimawh chu ZPM policy mil budget siam niin, Hnahthial district chhunga HoO-te hian district level-a ZPM policy mil budget in siam ka ring," a ti a, Hnahthial district tana hmasawnna tluantling thlen thei ngaihtuahpui turin a ngen.

Chief Minister-in a ngaih pawimawh em em chu personal bank account-a sorkar sum dah a nih thu sawiin South Tuipui Bialtu MLA chuan, "Hemi chungchangah hian keini district-a HoO-te hi chu kan fihlim turah ka ngai. Kan fimhlim lo a nih chuan tun atanga kan inchinfel hi a ṭul hle dawn a ni," a ti.

Jeje-a chuan hun vawn dik hi a pawimawh thu sawiin, "Sorkar chuan office kai hun leh ban hun a siam a, kan district-ah hian biometric attendance kan la ti thei kher lo mai thei. Chutih laiin biometric attendance kalpui ngai lo khawpa district rinawm leh rintlak ni turin ṭan la ang u," a ti a, office hun chhung vawndik kawngah HoO te an pawimawh thu a sawi.