KHAWTHLIR

Salvation Army, India Eastern Territory hnuaia corps hrang hrang band leh Salvation Army Youth (SAY) ten Red Kettle hmanga sum an hmuhte chu Ai­zawla veng hrang hranga YMA-te beráwn chunga ṭanpuina pek tura an thlan mi 76 hnenah Rs. 5,000 ṭheuh an pe a; damdawi-in hrang hrang - Aizawl Civil Hospital-a Dialysis Unit, State Referral Hospital, Cancer Hospital, Grace Home, Adventist Hospital leh Synod Hospital-a poor fund atan Rs. 20,000 

ṭheuh leh TNT-ah Rs. 50,000 an hlân bawk. Red Kettle Appeal Service 2019-a sum petu zawng zawngte hnenah Territorial Headquarters chuan Pathian hmingin lawmthu an sawi.

KṬP, Saikhamakawn Branch chuan an din champha pualin Ja­nuary 4, Inrinni khan an kohhran hall-ah blood donation camp an huaihawt a, Synod Hospital tan thisen unit 43 an pe a, petute mipa 36 leh hmeichhia pasarih an ni.

Mizoram Governor PS Shreedharan Pillai chuan Kozhikode, Kerala-a a chenna inah I-League khel tura zin Aizawl Football Club team chu January 4, Inrinni khan thingpui a inpui a, duhsakna a hlân. Larsap PS Shreedharan Pillai chuan, Aizawl FC chu theihtawp chhuaha khel tura fuihin, duhsakna a hlân a; Mizoram chu hmun rálmuang leh nuam tak a nih thu sawiin, "Tun hnaiah Mizoram State Games ropui taka neih a ni. Aizawl FC neitu leh Mizoram sorkar hmalaknain Mizoram chuan infiamna lamah nasa takin hma a sâwn mek a ni," a ti. Aizawl FC hi Inrinni zan khan Kozhikode khawpuiah Gokulam Kerala FC nen an intum a ni.

Krismas leh kumthar vuakvet avanga December 22, 2019 aṭanga Mizoram Journalist Association (MJA) pisa Aizawl Press Club khar a nih hnuin vawiin aṭang hian kumin atan hawn 

ṭan leh a ni dawn. Ai­zawl Press Club tlawh duh leh thil tih tur neite tan vawiin aṭang hian club hi tlawh theih a ni ang.