KHAWTHLIR

Minister-in enfiah

Sports minister Lalnghinglova Hmar, Aizawl West-II bialtu MLA chuan nimin zing khan a bial chhung Aizawl West Joint YMA Field, Vaivakawn a tlawh a, tihchangtlun dan tur a enfiah. Sports Minister chuan, "Delhi-ah ka zin dawn a, ka zin chhan ber ni lo mah se, he hnathawhna tur hi a theih ang angin ka rawn dap ang," a ti.

Result chhuak dawn

Mizoram University (MZU) Examinations department chuan MZU hnuaia under-graduate 1st Semester (NEP) Examination November – December 2023-a neih result chu vawiin hian a ti chhuak dawn. Result hi MZU website https://mzu.edu.in/ ah en theih a ni ang.

E-roll sawiho

Electoral Roll observer Lalzarmawii hoin nimin khan Saitualah Election official-te leh political party aiawhte'n Electoral Roll Special Summary Revision 2024 chungchang an sawiho a; Saitual district-a MLA bial pathumah draft roll hnuhnung ber aṭangin vote nei mi 55,679 an awm a ni.

Social Audit

Mizorama Rural Development (RD) Block 11 chhunga khaw 165-ah February 5-14 chhung hian MGNREGS Social Audit neih a ni dawn. Social audit hian a tum ber chu mipuite chawikanna leh hmasawnna scheme hrang hrang sorkarin a siam aṭanga hamṭhatna dawngtu, a bikin thingtlang mi, hna kalpui a nihna khuaa mipuite leh a scheme buaipuitu official zawng zawngte nena ṭangkawpa a ṭha thei ang bera a hlawhtlinna hmuh a nih theihna tura theihtawp chhuaha endikpui a ni.

Certification programme

Lok Sabha member inthlanpui neih tur atana inpuahchahna kal zelah nimin khan Mizoram chief electoral officer Madhup Vyas chuan Aijal Club conference hall-ah assistant returning officer (ARO)-te puala buatsaih 'Certification Programme' a hawng. Certification programme hi February 5-9, 2024 chhung awh tur niin, hemi hun chhung hian National Level Master Trainer (NLMT) mi pangain thupui thlan bik hmangin thil pawimawh an zirtir dawn a, training zawhah ARO-te hian exam an hmachhawn dawn a ni.