Nov. 2022 thlenga damlo bill pe tawh; Bill pek loh Rs 43,37,78,298 a la awm

Mizoram State Health Care Scheme (MSHCS) hnuaiah November, 2022 thlenga damlo inenkawlna senso (bill) lutte pek a ni tawh a; sorkarin January 19, 2024-a damlo bill tur cheng nuai 1,500 a pek chu hman zawh nghal a ni.

RTI Act hmanga January 15, 2024-a zawhna Mizoram State Heath Care Society SPIO-in January 30, 2024-a a chhàn danin, sorkar kum kal mek 2023-2024 ah damlo bill lut 7,072 zinga 6,951 pawm a ni a, bill 121 hnawl a ni.

Kum 2021-2022 chhunga bill lut zawng zawng 15,264 aṭangin November 2022 thlenga bill lut (9,875) pek a ni tawh a, hemi kuma bill lut zinga 5,389 (Rs 17,91,09,720) chu pek a la ni. Kum 2023-2024 chhunga January 30, 2024 thlenga bill lut 6,951 pawh pek a la ni lo.

Sorkar kum kal mek 2023-24 ah MSHCS chuan Mizoram sorkar aṭangin health care bill atan pawisa ṭum ruk a dawng tawh a, a vaiin Rs 62,00,00,000 a ni. MSHCS-in damlo bill pek tur atana sorkar aṭanga pawisa a dawn hnuhnung ber chu January 19, 2024 niin, Rs 15,00,00,000 a dawng a; sorkar thar hnuaia pawisa a dawn hmasak ber a ni.

MSHCS SPIO chuan, damlo bill tur pawisa kawl mek an neih leh neih loh zawhna chhangin, "Healthcare bill pekna atana sum kan dawn hi kan dawn veleh bill pek chhuah nan hman ral nghal zel a ni a, tun dinhmunah hian healthcare bill pekna tur pawisa kan nei lo," a ti.

MSHCS policy hi kum 2022 aṭangin sorkar kum chhiar dan (April-March) anga kalpui a ni a, a hma lam zawngah chuan October aṭanga a kum leh September thleng atan kalpui a ni ṭhin. Sorkar kum kal mekah MSHCS-a inziak lut chhungkaw 26,569 an awm a, chu'ng mite chuan kuminah bill 6,951 an thehlut tawh a ni.