Duhsakna lantir tura lehkhaziak a awm pawhin awmzia a awm dawn lo - Education Minister

School Education minister Dr Vanlalthlana chuan nimn khan Lawngtlai khaw chhunga zirna-in hrang hrang a tlawh a; Samagra Shiksha hnuaia hna lak turah a thiamte ngei lak an nih dawn thu leh khawi hmun aṭang pawhin duhsakna lantir tura lehkhaziak a awm a nih pawhin awmzia a awm loh tur thu a sawi.

DIET, Lawngtlai a tlawhnaah School Education minister Dr Vanlalthlana chuan, DIET chu zirtirtu turte zirtir chhàwn lehna hmun pawimawh tak a nih angin thiamna tak tak an zirtir chhuah ngeina turin leh dikna dinpui ngam tura huaisenna an zir chhuahna hmuna hmang turin zirlaite leh zirtirtute a chah.

Dr Vanlalthlana chuan, ram leh hnam hmangaihtu ni turin leh hmasawnna kawnga kaihruaitu ni thei tura ngaihtuahna hman a pawimawh thu sawiin, "Samagra Shiksha hnuaia mi 161 lakna turah pawh written exam bakah, an thiamnate a taka an hman chhuah thiam leh thiam loh endik nan ‘Demo-Teaching’ neih tura ruahman a ni a, khawi hmun aṭang pawhin duhsakna lantir tura lehkhaziak a awm a nih pawhin awmzia a awm dawn lo," a ti.

Tuna sorkar hna lak chung-changa kalphung thar hmanna hian nakin zelah mi taima, tumruh, a thiam leh phute chauhin hlawhtlinna an chan theih nana kawng sial lâwkna a nih thu Education Minister chuan a sawi.

Education Minister hian DIET, Lawngtlaia thawktute kawmin, thawktu indaih lohna leh building thawmṭhat ngaite an sawiho a; Region Higher Secondary School leh High School, Samagra Shiksha leh District Education Office-te a tlawh nghal a ni.